wo to baalin pe bhi aae nahin bulwane se

vo to bālīñ pe bhī aa.e nahīñ bulvāne se

fā.eda kyā dil-e-nādāñ tire ghabrāne se

chāhe ik ghūñT bhī saaqī na de lekin rindo

baat maiḳhāne kī bāhar na ho maiḳhāne se

apnī manzil pe pahuñch jā.eñge Thokar khā ke

raah ka.abe ko bhī jaatī hai sanam-ḳhāne se

ḳhaak kyoñ chhāntā phirtā hai bayābānoñ kī

aap ne ye bhī to pūchhā nahīñ dīvāne se

chand chhīñToñ se kahīñ bujhtī hai dahkī huī aag

aur ghabrāne lagā dil merā bahlāne se

aap ab pursish-e-ahvāl kī ḳhātir aa.e

baat bhī jab nahīñ kī jaatī hai dīvāne se

mai-kashī 'soz' kī fitrat meñ hai dāḳhil vaa.iz

riñd-mashrab hai na baaz aa.egā samjhāne se

wo to baalin pe bhi aae nahin bulwane se

faeda kya dil-e-nadan tere ghabrane se

chahe ek ghunT bhi saqi na de lekin rindo

baat maiKHane ki bahar na ho maiKHane se

apni manzil pe pahunch jaenge Thokar kha ke

rah kabe ko bhi jati hai sanam-KHane se

KHak kyon chhanta phirta hai bayabanon ki

aap ne ye bhi to puchha nahin diwane se

chand chhinTon se kahin bujhti hai dahki hui aag

aur ghabrane laga dil mera bahlane se

aap ab pursish-e-ahwal ki KHatir aae

baat bhi jab nahin ki jati hai diwane se

mai-kashi 'soz' ki fitrat mein hai daKHil waiz

rind-mashrab hai na baz aaega samjhane se