wo to gaya ye dida-e-KHun-bar dekhiye

vo to gayā ye dīda-e-ḳhūñ-bār dekhiye

dāman pe rañg-e-pairahan-e-yār dekhiye

dikhlā ke vo to le bhī gayā shoḳhi-e-ḳhirām

ab tak haiñ raqs meñ dar o dīvār dekhiye

uktā ke ham ne toḌī thī zanjīr-e-nām-o-nañg

ab tak fazā meñ hai vahī jhankār dekhiye

siine meñ chhup gayā hai tulū-e-sahar ke saath

ab shāḳh-e-dil pe vo gul-e-ruḳhsār dekhiye

barq-e-tapīda bād-e-sabā shola aur ham

haiñ kaise kaise us ke giraftār dekhiye

pahle bhī tez-rau the par us dil-nashīñ ke saath

ye chashm-e-nam ye masti-e-raftār dekhiye

'majrūh' ke laboñ se ye ḳhushbū na jā sakī

baḳhshī jo us ne daulat-e-bedār dekhiye

wo to gaya ye dida-e-KHun-bar dekhiye

daman pe rang-e-pairahan-e-yar dekhiye

dikhla ke wo to le bhi gaya shoKHi-e-KHiram

ab tak hain raqs mein dar o diwar dekhiye

ukta ke hum ne toDi thi zanjir-e-nam-o-nang

ab tak faza mein hai wahi jhankar dekhiye

sine mein chhup gaya hai tulu-e-sahar ke sath

ab shaKH-e-dil pe wo gul-e-ruKHsar dekhiye

barq-e-tapida baad-e-saba shola aur hum

hain kaise kaise us ke giraftar dekhiye

pahle bhi tez-rau the par us dil-nashin ke sath

ye chashm-e-nam ye masti-e-raftar dekhiye

'majruh' ke labon se ye KHushbu na ja saki

baKHshi jo us ne daulat-e-bedar dekhiye