wo tumtaraq-e-sikandar na qasr-e-shah mein hai

vo tumtarāq-e-sikandar na qasr-e-shāh meñ hai

jo baat 'rāhat'-e-ḳhasta kī ḳhānqāh meñ hai

use haTānā paḌegā junūñ kī Thokar se

ye kā.enāt rukāvaT mirī nigāh meñ hai

maiñ is samāj ko taslīm hī nahīñ kartā

ki ishq jaisī ibādat jahāñ gunāh meñ hai

ḳhayāl rukte nahīñ āhanī fasīloñ se

ki āh-e-ḳhalq kahāñ qudrat-e-sipāh meñ hai

ki ye bhī merī tarah bhūltī nahīñ tujh ko

isī liye to namī chashm-e-sair-gāh meñ hai

kahāñ bānegā to DeḌh iiñT kī masjid

tamām shahr to shāmil hudūd-e-shāh meñ hai

qadam qadam pe vahāñ haath ḳhaar bante haiñ

kashish ajiib sī 'rāhat' kisī kī raah meñ hai

wo tumtaraq-e-sikandar na qasr-e-shah mein hai

jo baat 'rahat'-e-KHasta ki KHanqah mein hai

use haTana paDega junun ki Thokar se

ye kaenat rukawaT meri nigah mein hai

main is samaj ko taslim hi nahin karta

ki ishq jaisi ibaadat jahan gunah mein hai

KHayal rukte nahin aahani fasilon se

ki aah-e-KHalq kahan qudrat-e-sipah mein hai

ki ye bhi meri tarah bhulti nahin tujh ko

isi liye to nami chashm-e-sair-gah mein hai

kahan banega to DeDh inT ki masjid

tamam shahr to shamil hudud-e-shah mein hai

qadam qadam pe wahan hath KHar bante hain

kashish ajib si 'rahat' kisi ki rah mein hai