wo yak-ba-yak use dil mein utarne ka amal

vo yak-ba-yak use dil meñ utārne kā 'amal

vo apnī zaat pe shab-ḳhūn mārne kā 'amal

hazār vasvase dil meñ aur ik dahaktā alaav

hayāt-e-dasht meñ rāteñ guzārne kā 'amal

bas ek ḳhosha-e-gandum aur aisī dar-ba-darī

vo āsmāñ ko zamīñ par utārne kā 'amal

ye 'umr mez hai gavayyā qimār-ḳhāne kī

bas ek jiit kī ḳhvāhish meñ hārne kā 'amal

vo band ḳhushbū kā bād-e-sabā ke vo nāḳhun

kalī ke jism se kapḌe utārne kā 'amal

ġhazab kā shor machāte ho.e ye sannāTe

vo be-sadā bhī kisī ko pukārne kā 'amal

hui hai shaam phir ashkoñ se ik vuzū ho 'nadīm'

phir ek raat sitāre shumārne kā 'amal

wo yak-ba-yak use dil mein utarne ka 'amal

wo apni zat pe shab-KHun marne ka 'amal

hazar waswase dil mein aur ek dahakta alaw

hayat-e-dasht mein raaten guzarne ka 'amal

bas ek KHosha-e-gandum aur aisi dar-ba-dari

wo aasman ko zamin par utarne ka 'amal

ye 'umr mez hai gawayya qimar-KHane ki

bas ek jit ki KHwahish mein haarne ka 'amal

wo band KHushbu ka baad-e-saba ke wo naKHun

kali ke jism se kapDe utarne ka 'amal

ghazab ka shor machate hoe ye sannaTe

wo be-sada bhi kisi ko pukarne ka 'amal

hui hai sham phir ashkon se ek wuzu ho 'nadim'

phir ek raat sitare shumarne ka 'amal