wo yun kho ke mujhe paya karenge

vo yuuñ kho ke mujhe paayā kareñge

mirā afsāna dohrāyā kareñge

sitam apne jo yaad aayā kareñge

to dil hī dil meñ pachhtāyā kareñge

ġhurūr-e-husn ko bātil samajh kar

sarāpā ishq ban jaayā kareñge

na hogī tāb-e-zabt-e-ġham jab un ko

yaqīnan ashk bhar laayā kareñge

qayāmat hoñgī nāzuk dil kī aaheñ

har ik zarre ko taḌpāyā kareñge

falak mātam karegā be-kasī par

mah-o-anjum taras khāyā kareñge

mujhe har gaam par Thukrāne vaale

mujhī par naaz farmāyā kareñge

na hogī jab sukūñ kī koī sūrat

kuchh apne dil ko samjhāyā kareñge

har ik tadbīr jab nākām hogī

to mujh ko rū-ba-rū paayā kareñge

nigāhoñ se milā kar vo nigāheñ

yakāyak ruḳh badal jaayā kareñge

vahī nāz-o-adā kī shakl hogī

isī sūrat se sharmāyā kareñge

maiñ kahtā hī rahūñgā qissa-e-ġham

vo sunte sunte so jaayā kareñge

magar jab hogā aalam ālam-e-ḳhvāb

na pā kar mujh ko ghabrāyā kareñge

'shakīl' apne liye lamhāt-e-fursat

payām-e-nau-ba-nau laayā kareñge

wo yun kho ke mujhe paya karenge

mera afsana dohraya karenge

sitam apne jo yaad aaya karenge

to dil hi dil mein pachhtaya karenge

ghurur-e-husn ko baatil samajh kar

sarapa ishq ban jaya karenge

na hogi tab-e-zabt-e-gham jab un ko

yaqinan ashk bhar laya karenge

qayamat hongi nazuk dil ki aahen

har ek zarre ko taDpaya karenge

falak matam karega be-kasi par

mah-o-anjum taras khaya karenge

mujhe har gam par Thukrane wale

mujhi par naz farmaya karenge

na hogi jab sukun ki koi surat

kuchh apne dil ko samjhaya karenge

har ek tadbir jab nakaam hogi

to mujh ko ru-ba-ru paya karenge

nigahon se mila kar wo nigahen

yakayak ruKH badal jaya karenge

wahi naz-o-ada ki shakl hogi

isi surat se sharmaya karenge

main kahta hi rahunga qissa-e-gham

wo sunte sunte so jaya karenge

magar jab hoga aalam aalam-e-KHwab

na pa kar mujh ko ghabraya karenge

'shakil' apne liye lamhat-e-fursat

payam-e-nau-ba-nau laya karenge