wo zaiqa bhi ajab sidq-e-nagawar mein tha

vo zā.iqa bhī 'ajab sidq-e-nāgavār meñ thā

ġhubār sā koī mafhūm harf-e-zār meñ thā

na tū sharīk-e-‘adāvat thā aur na pyaar meñ thā

tirā yaqīn tijārat meñ kārobār meñ thā

bulandiyoñ se girā bhī to ḳhush-gavār lagā

mire zavāl kā uslūb ābshār meñ thā

kise dimāġh ki tohmat junūñ kī sar letā

ki jab ḳhumār-e-anā zauq-e-ishtihār meñ thā

kise sunā.eñ karāheñ sisakte sāyoñ kī

samā'atoñ kā ḳhudā shor ke hisār meñ thā

'ajīb dhund hai phailī huī jidhar dekho

ThiThak ke apnī jagah har koī dayār meñ thā

ġhazal ke she'r kī mānind thā suḳhan us kā

kamāl-e-ramz-e-suḳhan tarz-e-iḳhtisār meñ thā

hai zaḳhm zaḳhm lahū-āshnā badan saarā

ye chakrvyūh to yāroñ ke e'tibār meñ thā

maiñ us ke saath hī ho jaatā kaise mumkin thā

vo lauT aatā kahāñ us ke iḳhtiyār meñ thā

sharīk-e-vāqi'a kartā hai apne qaarī ko

'ajab kamāl-e-hunar vāqi'a-nigār meñ thā

qayāmateñ ka.ī mujh par guzar ga.iiñ 'sarshār'

maiñ ḳhush-gumān karam hī ke intizār meñ thā

wo zaiqa bhi 'ajab sidq-e-nagawar mein tha

ghubar sa koi mafhum harf-e-zar mein tha

na tu sharik-e-‘adawat tha aur na pyar mein tha

tera yaqin tijarat mein karobar mein tha

bulandiyon se gira bhi to KHush-gawar laga

mere zawal ka uslub aabshaar mein tha

kise dimagh ki tohmat junun ki sar leta

ki jab KHumar-e-ana zauq-e-ishtihaar mein tha

kise sunaen karahen sisakte sayon ki

sama'aton ka KHuda shor ke hisar mein tha

'ajib dhund hai phaili hui jidhar dekho

ThiThak ke apni jagah har koi dayar mein tha

ghazal ke she'r ki manind tha suKHan us ka

kamal-e-ramz-e-suKHan tarz-e-iKHtisar mein tha

hai zaKHm zaKHm lahu-ashna badan sara

ye chakrwyuh to yaron ke e'tibar mein tha

main us ke sath hi ho jata kaise mumkin tha

wo lauT aata kahan us ke iKHtiyar mein tha

sharik-e-waqi'a karta hai apne qari ko

'ajab kamal-e-hunar waqi'a-nigar mein tha

qayamaten kai mujh par guzar gain 'sarshaar'

main KHush-guman karam hi ke intizar mein tha