wo zaKHm mile ruh ko patthar ke sanam se

vo zaḳhm mile ruuh ko patthar ke sanam se

karte haiñ shab-o-roz vuzū dīda-e-nam se

afsos javānī meñ kamar jhuk ga.ī us kī

hairat hai ki vo haar gayā ranj-o-alam se

raas aa ga.ī sahrā ko mirī ashk-fishānī

ashjār sukūñ paate haiñ aksar mire ġham se

ye soch ke tasvīr jalā.ī nahīñ us kī

mahrūm na ho jā.ūñ kahīñ nazr-e-karam se

vo vasl kī shab ek qadam pīchhe haTā thā

phir fāsle baḌhte ga.e us ek qadam se

yādoñ kā mahal aaj bhī ta.amīr hai dil par

yā yuuñ kahūñ raushan hai ye ghar aap ke dam se

vo but jo ibādat meñ ḳhalal bantā hai merī

us but ko nikālūñgā kisī roz haram se

sadqa haiñ tire husn kā ye chāñd-sitāre

sūraj ko milā nuur tire naqsh-e-qadam se

ham ahl-e-azā ahl-e-bukā ahl-e-fuġhāñ haiñ

kyā ḳhaak taqābul ho zamāne tirā ham se

do sher kahe ḳhud ko samajhne lage 'ġhālib'

qirtās se vāqif haiñ na vāqif haiñ qalam se

yuuñ kūcha-e-jānāñ se nikālā gayā 'mehvar'

aadam ko nikālā gayā jis taur iram se

wo zaKHm mile ruh ko patthar ke sanam se

karte hain shab-o-roz wuzu dida-e-nam se

afsos jawani mein kamar jhuk gai us ki

hairat hai ki wo haar gaya ranj-o-alam se

ras aa gai sahra ko meri ashk-fishani

ashjar sukun pate hain aksar mere gham se

ye soch ke taswir jalai nahin us ki

mahrum na ho jaun kahin nazr-e-karam se

wo wasl ki shab ek qadam pichhe haTa tha

phir fasle baDhte gae us ek qadam se

yaadon ka mahal aaj bhi tamir hai dil par

ya yun kahun raushan hai ye ghar aap ke dam se

wo but jo ibaadat mein KHalal banta hai meri

us but ko nikalunga kisi roz haram se

sadqa hain tere husn ka ye chand-sitare

suraj ko mila nur tere naqsh-e-qadam se

hum ahl-e-aza ahl-e-buka ahl-e-fughan hain

kya KHak taqabul ho zamane tera hum se

do sher kahe KHud ko samajhne lage 'ghaalib'

qirtas se waqif hain na waqif hain qalam se

yun kucha-e-jaanan se nikala gaya 'mehwar'

aadam ko nikala gaya jis taur iram se