wufur-e-shauq mein aah-o-fughan ko bhul gae

vufūr-e-shauq meñ āh-o-fuġhāñ ko bhuul ga.e

tum aa ga.e to ġham-e-do-jahāñ ko bhuul ga.e

asīr-e-ġham haiñ qafas meñ guzār lete haiñ

chaman ko bhuul ga.e āshiyāñ ko bhuul ga.e

hayāt-e-chand-nafas meñ kashākash-e-paiham

rahī hai utnī ki dard-e-nihāñ ko bhuul ga.e

darāz-dastī-e-aġhyār kā gilā kyā hai

adū ko bhuul ga.e mehrbāñ ko bhuul ga.e

rah-e-hayāt kī manzil ajiib pechīda

kahāñ kī raah ḳhud ham kārvāñ ko bhuul ga.e

sunā.eñ ishq kī rūdād kyā tumheñ ai 'barq'

hai muḳhtasar sī magar dāstāñ ko bhuul ga.e

wufur-e-shauq mein aah-o-fughan ko bhul gae

tum aa gae to gham-e-do-jahan ko bhul gae

asir-e-gham hain qafas mein guzar lete hain

chaman ko bhul gae aashiyan ko bhul gae

hayat-e-chand-nafas mein kashakash-e-paiham

rahi hai utni ki dard-e-nihan ko bhul gae

daraaz-dasti-e-aghyar ka gila kya hai

adu ko bhul gae mehrban ko bhul gae

rah-e-hayat ki manzil ajib pechida

kahan ki rah KHud hum karwan ko bhul gae

sunaen ishq ki rudad kya tumhein ai 'barq'

hai muKHtasar si magar dastan ko bhul gae