wusat-e-aghosh-e-alam be-karan hote hue

vus'at-e-āġhosh-e-ālam be-karāñ hote hue

dar-ba-dar phirte haiñ ham saarā jahāñ hote hue

koī māñge ke ujāle kā bharosa kyā kare

ham ne dekhā hai charāġhoñ ko dhuāñ hote hue

de diyā hai ḳhūn-e-dil se jāñ-nisārī kā subūt

jab kabhī dekhā hai un ko bad-gumāñ hote hue

faḳhr mat karnā zar-o-māl-e-jahāñ par dosto

achchhe-achchhoñ ko hai dekhā be-nishāñ hote hue

jang-āmāda huī jab sehn-e-gulshan kī havā

TukḌe TukḌe sab ne dekhā āshiyāñ hote hue

kyoñ zalīl-o-ḳhvār hote jā rahe haiñ ahl-e-haq

daar tak jaane kī lambī dāstāñ hote hue

ham ne rakkhī hai 'zakī' mahfūz ġham kī aabrū

muskurāte haiñ sadā dard-e-nihāñ hote hue

wus'at-e-aghosh-e-alam be-karan hote hue

dar-ba-dar phirte hain hum sara jahan hote hue

koi mange ke ujale ka bharosa kya kare

hum ne dekha hai charaghon ko dhuan hote hue

de diya hai KHun-e-dil se jaan-nisari ka subut

jab kabhi dekha hai un ko bad-guman hote hue

faKHr mat karna zar-o-mal-e-jahan par dosto

achchhe-achchhon ko hai dekha be-nishan hote hue

jang-amada hui jab sehn-e-gulshan ki hawa

TukDe TukDe sab ne dekha aashiyan hote hue

kyon zalil-o-KHwar hote ja rahe hain ahl-e-haq

dar tak jaane ki lambi dastan hote hue

hum ne rakkhi hai 'zaki' mahfuz gham ki aabru

muskuraate hain sada dard-e-nihan hote hue