wusat-e-sahra ke aage aasman chhoTa laga

vus'at-e-sahrā ke aage āsmāñ chhoTā lagā

dhuup aisī thī ki sar ko sā.ebāñ chhoTā lagā

log ḳhush-fahmī ke panjoñ par khaḌe the fitratan

aur yuuñ qad merā un ke darmiyāñ chhoTā lagā

yaas mahrūmī tazabzub karb ḳhush-fahmī anā

itne sāmāñ the mirā tanhā makāñ chhoTā lagā

jī rahā hai vā'da-e-fardā pe tere ai ḳhudā

varna is bande ko terā ye jahāñ chhoTā lagā

ek ik lamhe kā jab māñgā gayā mujh se hisāb

jaane kyoñ zehn-e-shahanshāh-e-zamāñ chhoTā lagā

duur se qatra bhī ik dariyā nazar aayā mujhe

qurbatoñ kī zad meñ bahr-e-bekarāñ chhoTā lagā

wus'at-e-sahra ke aage aasman chhoTa laga

dhup aisi thi ki sar ko saeban chhoTa laga

log KHush-fahmi ke panjon par khaDe the fitratan

aur yun qad mera un ke darmiyan chhoTa laga

yas mahrumi tazabzub karb KHush-fahmi ana

itne saman the mera tanha makan chhoTa laga

ji raha hai wa'da-e-farda pe tere ai KHuda

warna is bande ko tera ye jahan chhoTa laga

ek ek lamhe ka jab manga gaya mujh se hisab

jaane kyon zehn-e-shahanshah-e-zaman chhoTa laga

dur se qatra bhi ek dariya nazar aaya mujhe

qurbaton ki zad mein bahr-e-bekaran chhoTa laga