wusat-e-daman-e-sahra dekhun

vus.at-e-dāman-e-sahrā dekhūñ

apnī āvāz ko phailā dekhūñ

haath meñ chāñd ko pighlā dekhūñ

ḳhvāb dekhūñ ki ḳharāba dekhūñ

sat.h par aks ko bahtā dekhūñ

dariyā dariyā tirā saaya dekhūñ

ḳhud ko dekhūñ tirā chehra dekhūñ

ā.īna toḌ duuñ phir kyā dekhūñ

apne saa.e ko barahna pā.ūñ

saath rusvā.ī ko hañstā dekhūñ

retīlī dhuup meñ aate jaate

mahmil-e-vaqt ko Thahrā dekhūñ

sub.h ke phuul ko hañstā pā kar

raat kī aañkh meñ kāñTā dekhūñ

shahr meñ log jise DhūñDte haiñ

apne ghar meñ use baiThā dekhūñ

aisā din aa.e na hargiz 'ādil'

jaise jī meñ use martā dekhūñ

wusat-e-daman-e-sahra dekhun

apni aawaz ko phaila dekhun

hath mein chand ko pighla dekhun

KHwab dekhun ki KHaraba dekhun

sath par aks ko bahta dekhun

dariya dariya tera saya dekhun

KHud ko dekhun tera chehra dekhun

aaina toD dun phir kya dekhun

apne sae ko barahna paun

sath ruswai ko hansta dekhun

retili dhup mein aate jate

mahmil-e-waqt ko Thahra dekhun

subh ke phul ko hansta pa kar

raat ki aankh mein kanTa dekhun

shahr mein log jise DhunDte hain

apne ghar mein use baiTha dekhun

aisa din aae na hargiz 'adil'

jaise ji mein use marta dekhun