ya-rab hai aaj un ke KHud aane ka kya sabab

yā-rab hai aaj un ke ḳhud aane kā kyā sabab

ulfat jatā ke mujh ko manāne kā kyā sabab

manzūr mere rone pe hañsnā agar na thā

ġhairoñ se hañs ke mujh ko rulāne kā kyā sabab

sābit huā ki vasl meñ hai uzr aap ko

mauqe ke vaqt varna bahāne kā kyā sabab

maanā ki aap aane meñ jaatī hai shān-e-husn

par jab bulā.ūñ maiñ to na aane kā kyā sabab

shāyad tumhārī zulm kī aadat hī ho ga.ī

āshiq ko varna roz satāne kā kyā sabab

pūchhā jo maiñ ne kitne haiñ āshiq tire kahā

kyoñ pūchhte ho haal zamāne kā kyā sabab

sāhib ḳhatā muaaf mujhe shak to kuchh nahīñ

be-vaqt lekin aaj nahāne kā kyā sabab

ai dil payām-e-vasl ye un kī taraf se hai

is vaqt varna baam pe aane kā kyā sabab

ai 'sehr' kyā hai dil kahīñ aaya batā.iye

kū-e-butāñ meñ roz ke jaane kā kyā sabab

ya-rab hai aaj un ke KHud aane ka kya sabab

ulfat jata ke mujh ko manane ka kya sabab

manzur mere rone pe hansna agar na tha

ghairon se hans ke mujh ko rulane ka kya sabab

sabit hua ki wasl mein hai uzr aap ko

mauqe ke waqt warna bahane ka kya sabab

mana ki aap aane mein jati hai shan-e-husn

par jab bulaun main to na aane ka kya sabab

shayad tumhaari zulm ki aadat hi ho gai

aashiq ko warna roz satane ka kya sabab

puchha jo main ne kitne hain aashiq tere kaha

kyon puchhte ho haal zamane ka kya sabab

sahib KHata muaf mujhe shak to kuchh nahin

be-waqt lekin aaj nahane ka kya sabab

ai dil payam-e-wasl ye un ki taraf se hai

is waqt warna baam pe aane ka kya sabab

ai 'sehr' kya hai dil kahin aaya bataiye

ku-e-butan mein roz ke jaane ka kya sabab