ya-rab is inqalab se ghabra raha hun main

yā-rab is inqalāb se ghabrā rahā huuñ maiñ

ab dil rahā na dil kī tamanna rahā huuñ maiñ

ġham māñgtā huuñ aur ḳhushī pā rahā huuñ maiñ

kis husn se tabāh kiyā jā rahā huuñ maiñ

mere sivā sabhī jise kahte haiñ zindagī

tere firāq meñ vo sazā pā rahā huuñ maiñ

tāroñ kī tarah raushan-o-mahfūz huuñ magar

duniyā ko dekh dekh ke tharrā rahā huuñ maiñ

aa.egā in laboñ pe tabassum na mere baad

saarī bahār luuT ke le jā rahā huuñ maiñ

rutba-shanās-e-zarra-o-ḳhurshīd huuñ magar

har chiiz par nigāh ko Thahrā rahā huuñ maiñ

himmat bañdhī rahe to ġham-e-do-jahān kyā

tum chup ho bas isī liye ghabrā rahā huuñ maiñ

ai kohnagī-e-nazm-e-shab-o-roz hoshiyār

dil se ik āftāb ko chamkā rahā huuñ maiñ

us vaqt intizār kā aalam na pūchhiye

jab koī baar baar kahe aa rahā huuñ maiñ

kartā huuñ dil meñ shaam ko yuuñ sub.h kā ḳhayāl

jaise kisī qusūr pe pachhtā rahā huuñ maiñ

dair-o-haram ke daam bichhā kar zamīn par

kis kis tarah talāsh kiyā jā rahā huuñ maiñ

yaad aa na ai nasīm-e-sahar ai shaguftagī

ab dhuup tez ho ga.ī murjhā rahā huuñ maiñ

qabze meñ do jahāñ nahīñ ai dost kyā karūñ

sar rakh ke tere paañv pe pachhtā rahā huuñ maiñ

ab zabt-e-ġham kī laaj hai 'shādāñ' ḳhudā ke haath

ab tak to dil kī baat chhupātā rahā huuñ maiñ

ya-rab is inqalab se ghabra raha hun main

ab dil raha na dil ki tamanna raha hun main

gham mangta hun aur KHushi pa raha hun main

kis husn se tabah kiya ja raha hun main

mere siwa sabhi jise kahte hain zindagi

tere firaq mein wo saza pa raha hun main

taron ki tarah raushan-o-mahfuz hun magar

duniya ko dekh dekh ke tharra raha hun main

aaega in labon pe tabassum na mere baad

sari bahaar luT ke le ja raha hun main

rutba-shanas-e-zarra-o-KHurshid hun magar

har chiz par nigah ko Thahra raha hun main

himmat bandhi rahe to gham-e-do-jahan kya

tum chup ho bas isi liye ghabra raha hun main

ai kohnagi-e-nazm-e-shab-o-roz hoshiyar

dil se ek aaftab ko chamka raha hun main

us waqt intizar ka aalam na puchhiye

jab koi bar bar kahe aa raha hun main

karta hun dil mein sham ko yun subh ka KHayal

jaise kisi qusur pe pachhta raha hun main

dair-o-haram ke dam bichha kar zamin par

kis kis tarah talash kiya ja raha hun main

yaad aa na ai nasim-e-sahar ai shaguftagi

ab dhup tez ho gai murjha raha hun main

qabze mein do jahan nahin ai dost kya karun

sar rakh ke tere panw pe pachhta raha hun main

ab zabt-e-gham ki laj hai 'shadan' KHuda ke hath

ab tak to dil ki baat chhupata raha hun main