ya-rab ye kaisa aaj ka insan ho gaya

yā-rab ye kaisā aaj kā insān ho gayā

taḳhlīq kar ke tū bhī pashemān ho gayā

mausam bahār kā thā ḳhizāñ jald aa ga.ī

hañstā huā chaman mirā vīrān ho gayā

luuTā hai jis ne shahr ke sabr-o-qarār ko

vo shaḳhs mere shahr kā pardhān ho gayā

aise na.e chalan kī chalīñ āñdhiyāñ yahāñ

insān apnī zaat meñ haivān ho gayā

chāhā thā maiñ ne dil se kabhī tujh ko TuuT kar

vo hādisa hayāt kā unvān ho gayā

thiiñ zindagī kī raah meñ dushvāriyāñ bahut

marnā kisī ke ishq meñ āsān ho gayā

itnā hasīn hai mire 'gulshan' kā bāñkpan

har gul mirī nigāh meñ zīshān ho gayā

ya-rab ye kaisa aaj ka insan ho gaya

taKHliq kar ke tu bhi pasheman ho gaya

mausam bahaar ka tha KHizan jald aa gai

hansta hua chaman mera viran ho gaya

luTa hai jis ne shahr ke sabr-o-qarar ko

wo shaKHs mere shahr ka pardhan ho gaya

aise nae chalan ki chalin aandhiyan yahan

insan apni zat mein haiwan ho gaya

chaha tha main ne dil se kabhi tujh ko TuT kar

wo hadisa hayat ka unwan ho gaya

thin zindagi ki rah mein dushwariyan bahut

marna kisi ke ishq mein aasan ho gaya

itna hasin hai mere 'gulshan' ka bankpan

har gul meri nigah mein zishan ho gaya