yaad aate ho kis saliqe se

yaad aate ho kis salīqe se

jaise bārish ho vaqfe vaqfe se

yaad koī rahī ho vābasta

jaise har rut ke ḳhaas lamhe se

jaise ye bhī ho husn kā andāz

baat karnā magar taqāze se

mausam-e-gul ko koī batlā do

dil bhī khiltā hai phuul khilne se

raat kā apnā husn hotā hai

raat ko dekh din ke shīshe se

mere siine meñ rakh gayā har dard

merā hamdard kis qarīne se

ik shahādat hai raah meñ marnā

maut hai lauT jaanā raste se

lutf ūñchī uḌaan meñ kyā hai

pūchh lenā kisī parinde se

har muḳhālif hai vājib-ul-qatl aaj

tere islām ke havāle se

kār-farmā hai kyā pas-e-alfāz

kitnā vāzeh hai tere lahje se

kaun sī baat ho ga.ī aisī

yaar uThne lage haiñ chupke se

dekh raftār-e-zindagī 'rūhī'

ruk ga.ī gaaḌī ek jhaTke se

yaad aate ho kis saliqe se

jaise barish ho waqfe waqfe se

yaad koi rahi ho wabasta

jaise har rut ke KHas lamhe se

jaise ye bhi ho husn ka andaz

baat karna magar taqaze se

mausam-e-gul ko koi batla do

dil bhi khilta hai phul khilne se

raat ka apna husn hota hai

raat ko dekh din ke shishe se

mere sine mein rakh gaya har dard

mera hamdard kis qarine se

ek shahadat hai rah mein marna

maut hai lauT jaana raste se

lutf unchi uDan mein kya hai

puchh lena kisi parinde se

har muKHalif hai wajib-ul-qatl aaj

tere islam ke hawale se

kar-farma hai kya pas-e-alfaz

kitna wazeh hai tere lahje se

kaun si baat ho gai aisi

yar uThne lage hain chupke se

dekh raftar-e-zindagi 'ruhi'

ruk gai gaDi ek jhaTke se