yaad-e-gesu mein pareshan kis qadar dil ho gaya

yād-e-gesū meñ pareshāñ kis qadar dil ho gayā

intihā ye hai ki dūd-e-sham.a-e-mahfil ho gayā

jalva-farmā koī rashk-e-māh-e-kāmil ho gayā

allah-allah ab kisī qābil mirā dil ho gayā

kashtī-e-umr-e-ravāñ kā hāl-e-nākāmī na pūchh

paas jab sāhil ke pahuñchī duur sāhil ho gayā

saath ġhairoñ ke vo aa.e haiñ ayādat ke liye

sharbat-e-dīdār bhī ab samm-e-qātil ho gayā

dil vo lenā chāheñ to le jaa.eñ is kā ġham nahīñ

is liye ḳhush huuñ ki ye dil un ke qābil ho gayā

hosh meñ aa hosh meñ ai ham-nashīñ āzād ho

ban ke dīvāna tū pāband-e-salāsil ho gayā

pher dī sayyād ne kyā us kī gardan par chhurī

yak-ba-yak mauqūf kyoñ shor-e-anādil ho gayā

rafta rafta dāġh-e-dil ne kī taraqqī is qadar

pahle taarā thā magar ab māh-e-kāmil ho gayā

tere ik tīr-e-nazar ne kar diyā donoñ kā kaam

ai sitam-parvar jigar bhī dil bhī ghāyal ho gayā

tere bīmār-e-mohabbat kī ye hālat ho ga.ī

baiThnā uThnā to kyā dam lenā mushkil ho gayā

un kī mahfil se jo uThvā.e ga.e vo aur haiñ

maiñ to har mahfil meñ 'sābir' rang-e-mahfil ho gayā

yaad-e-gesu mein pareshan kis qadar dil ho gaya

intiha ye hai ki dud-e-shama-e-mahfil ho gaya

jalwa-farma koi rashk-e-mah-e-kaamil ho gaya

allah-allah ab kisi qabil mera dil ho gaya

kashti-e-umr-e-rawan ka haal-e-nakaami na puchh

pas jab sahil ke pahunchi dur sahil ho gaya

sath ghairon ke wo aae hain ayaadat ke liye

sharbat-e-didar bhi ab samm-e-qatil ho gaya

dil wo lena chahen to le jaen is ka gham nahin

is liye KHush hun ki ye dil un ke qabil ho gaya

hosh mein aa hosh mein ai ham-nashin aazad ho

ban ke diwana tu paband-e-salasil ho gaya

pher di sayyaad ne kya us ki gardan par chhuri

yak-ba-yak mauquf kyon shor-e-anadil ho gaya

rafta rafta dagh-e-dil ne ki taraqqi is qadar

pahle tara tha magar ab mah-e-kaamil ho gaya

tere ek tir-e-nazar ne kar diya donon ka kaam

ai sitam-parwar jigar bhi dil bhi ghayal ho gaya

tere bimar-e-mohabbat ki ye haalat ho gai

baiThna uThna to kya dam lena mushkil ho gaya

un ki mahfil se jo uThwae gae wo aur hain

main to har mahfil mein 'sabir' rang-e-mahfil ho gaya