yaad-e-mazi ke diye yun dil-e-viran mein jalen

yād-e-māzī ke diye yuuñ dil-e-vīrāñ meñ jaleñ

jis tarah sham.eñ kisī gor-e-ġharībāñ meñ jaleñ

ġham-e-daurāñ meñ jaleñ yā ġham-e-jānāñ meñ jaleñ

ham ko jalnā hai sahar tak kisī aivāñ meñ jaleñ

raakh ke Dher haiñ ham kaun kurede ham ko

laakh ham ahl-e-vafā ātish-e-pinhāñ meñ jaleñ

aaj bujhne ko hai ye bhī dil-e-muflis kī tarah

kab tak āñkhoñ ke kañval furqat-e-jānāñ meñ jaleñ

hai hamārā hī lahū jaam meñ raqsāñ saaqī

ham vo haiñ jin ke makāñ jashn-e-bahārāñ meñ jaleñ

kaash ho jaa.e jahāñ sho.ala-ba-dāmāñ 'naqvī'

jism insān ke kyoñ ātish-e-insāñ meñ jaleñ

yaad-e-mazi ke diye yun dil-e-viran mein jalen

jis tarah shamen kisi gor-e-ghariban mein jalen

gham-e-dauran mein jalen ya gham-e-jaanan mein jalen

hum ko jalna hai sahar tak kisi aiwan mein jalen

rakh ke Dher hain hum kaun kurede hum ko

lakh hum ahl-e-wafa aatish-e-pinhan mein jalen

aaj bujhne ko hai ye bhi dil-e-muflis ki tarah

kab tak aankhon ke kanwal furqat-e-jaanan mein jalen

hai hamara hi lahu jam mein raqsan saqi

hum wo hain jin ke makan jashn-e-bahaaran mein jalen

kash ho jae jahan shoala-ba-daman 'naqwi'

jism insan ke kyon aatish-e-insan mein jalen