yaad guzre hue lamhon ki saza ho jaise

yaad guzre hue lamhoñ kī sazā ho jaise

pur-sukūñ jhiil meñ kankar sā girā ho jaise

dil ne bhūle se tirā naam liyā hai jab bhī

band kamre meñ koī saaz bajā ho jaise

lams pā ke vo bikharnā tirī rā'nā.ī kā

shāḳh ne saath havāoñ kā diyā ho jaise

muskurāhaT hai ki qāsid koī paiġhām liye

oT meñ band darīche kī khaḌā ho jaise

tang bistar meñ ta.ayyush kā sunahrī sapnā

zard pattoñ meñ koī phuul khilā ho jaise

sub.h-dam vo tirī añgḌā.ī kā aalam tauba

raat kā mast badan TuuT rahā ho jaise

dekh mahfil meñ dhuāñ phail gayā hai 'anjum'

maiñ ne bhūle se tirā naam liyā ho jaise

yaad guzre hue lamhon ki saza ho jaise

pur-sukun jhil mein kankar sa gira ho jaise

dil ne bhule se tera nam liya hai jab bhi

band kamre mein koi saz baja ho jaise

lams pa ke wo bikharna teri ra'nai ka

shaKH ne sath hawaon ka diya ho jaise

muskurahaT hai ki qasid koi paigham liye

oT mein band dariche ki khaDa ho jaise

tang bistar mein tayyush ka sunahri sapna

zard patton mein koi phul khila ho jaise

subh-dam wo teri angDai ka aalam tauba

raat ka mast badan TuT raha ho jaise

dekh mahfil mein dhuan phail gaya hai 'anjum'

main ne bhule se tera nam liya ho jaise