yaad hai ab tak mohabbat ka zamana yaad hai

yaad hai ab tak mohabbat kā zamāna yaad hai

apnī duniyā ko tire hāthoñ miTānā yaad hai

sham.a kā vaqt-e-sahar vo jhilmilānā yaad hai

aur mire pahlū se terā uTh ke jaanā yaad hai

ik qayāmat thī tirī ārā.ish-e-husn-o-jamāl

mere dil ko dām-e-gesū meñ phañsānā yaad hai

iḳhtitām-e-be-sukūñ thī ibtidā-e-āshiqī

zindagī ko lafz-e-be-ma.anī banānā yaad hai

nazroñ nazroñ meñ vo merā shikva-e-bedād-o-zulm

bātoñ bātoñ meñ vo terā ruuTh jaanā yaad hai

shām-e-furqat thī ki paiġhām-e-qayāmat thā mujhe

dil kā vo pahlū badal kar tilmilānā yaad hai

vo tirī duzdīda nazreñ vo nigāh-e-avvalīñ

vo tirā ḳhud ko dikhānā aur chhupānā yaad hai

vo tirā husn-e-tajalli al-hafīz-o-al-amāñ

merī āñkhoñ meñ mire dil meñ samānā yaad hai

husn ke naġhmāt ulfat ke tarāne gaa.e haiñ

abr-ālūda fazāoñ meñ vo gaanā yaad hai

dil ke vo paiham taqāze vo mirī majbūriyāñ

bin-bulā.e vo tirī mahfil meñ aanā yaad hai

bā.is-e-sad-faḳhr thī mujh ko kabhī qurbat tirī

imbisāt-afzā mohabbat kā fasānā yaad hai

chāñdnī rātoñ meñ vo sehn-e-chaman meñ ghūmnā

Daal kar bāñheñ gale meñ muskurānā yaad hai

kis tarah maiñ mahv kar duuñ qalb-e-afsurda kī yaad

qissa-e-dil tujh ko ro ro kar sunānā yaad hai

ab na vo ahd-e-guzishta hai na vo 'afzal' shabāb

vo bahāreñ luT ga.iiñ jin kā fasāna yaad hai

yaad hai ab tak mohabbat ka zamana yaad hai

apni duniya ko tere hathon miTana yaad hai

shama ka waqt-e-sahar wo jhilmilana yaad hai

aur mere pahlu se tera uTh ke jaana yaad hai

ek qayamat thi teri aaraish-e-husn-o-jamal

mere dil ko dam-e-gesu mein phansana yaad hai

iKHtitam-e-be-sukun thi ibtida-e-ashiqi

zindagi ko lafz-e-be-mani banana yaad hai

nazron nazron mein wo mera shikwa-e-bedad-o-zulm

baaton baaton mein wo tera ruTh jaana yaad hai

sham-e-furqat thi ki paigham-e-qayamat tha mujhe

dil ka wo pahlu badal kar tilmilana yaad hai

wo teri duzdida nazren wo nigah-e-awwalin

wo tera KHud ko dikhana aur chhupana yaad hai

wo tera husn-e-tajalli al-hafiz-o-al-aman

meri aankhon mein mere dil mein samana yaad hai

husn ke naghmat ulfat ke tarane gae hain

abr-aluda fazaon mein wo gana yaad hai

dil ke wo paiham taqaze wo meri majburiyan

bin-bulae wo teri mahfil mein aana yaad hai

bais-e-sad-faKHr thi mujh ko kabhi qurbat teri

imbisat-afza mohabbat ka fasana yaad hai

chandni raaton mein wo sehn-e-chaman mein ghumna

Dal kar banhen gale mein muskurana yaad hai

kis tarah main mahw kar dun qalb-e-afsurda ki yaad

qissa-e-dil tujh ko ro ro kar sunana yaad hai

ab na wo ahd-e-guzishta hai na wo 'afzal' shabab

wo bahaaren luT gain jin ka fasana yaad hai