yaad haq ki hai zamane se faramoshi hai

yaad haq kī hai zamāne se farāmoshī hai

hosh kā hosh hai be-hoshī kī be-hoshī hai

hosh meñ huuñ na mujhe daura-e-be-hoshī hai

ek hālat hai ki hālat se farāmoshī hai

kaun kahtā hai mirā ālam-e-be-hoshī hai

hosh kāmil hai mujhe is liye ḳhāmoshī hai

shaad huuñ aaj mirī rasm-e-kafan-poshī hai

aaj duniyā ke jhameloñ se subukdoshī hai

vāqif-e-rāz-e-haqīqat mirī be-hoshī hai

ālam-e-hosh mirā ālam-e-be-hoshī hai

dard-e-dil tū ne musībat meñ sadā saath diyā

bhuul jaanā tujhe ehsān-farāmoshī hai

jo haiñ āzād vo gulshan meñ bahāreñ lūTeñ

merī qismat meñ qafas se hī ham-āġhoshī hai

lab pe kyoñ aa.e kabhī terī jafāoñ kā gila

hāsil-e-ishq mirā tarz-e-vafā-koshī hai

dekh hī leñge tujhe dekhne vaale tere

kis liye parda hai kis baat pe rūposhī hai

jab mujhe hosh na thā hosh kī tākīdeñ thiiñ

hosh meñ huuñ to mujhe dāvat-e-be-hoshī hai

hosh vaalā ye samajh jaa.e to hosh aa jaa.e

markaz-e-dā.era-e-hosh hī be-hoshī hai

hosh vaale ye haqīqat tujhe ma.alūm nahīñ

hosh kī had se idhar ālam-e-be-hoshī hai

dil merā rāh-e-tarīqat meñ vahīñ baiTh gayā

jab ye samjhā ki tamanna bhī ġhalat-koshī hai

miT ga.iiñ dil se tamannā.eñ ye achchhā hī huā

ab mujhe yās-o-musībat se subukdoshī hai

ka.aba-o-dair ke jhagḌe to abas haiñ 'sūfī'

ḳhāna-e-dil ke sivā har jagah rū-poshī hai

yaad haq ki hai zamane se faramoshi hai

hosh ka hosh hai be-hoshi ki be-hoshi hai

hosh mein hun na mujhe daura-e-be-hoshi hai

ek haalat hai ki haalat se faramoshi hai

kaun kahta hai mera aalam-e-be-hoshi hai

hosh kaamil hai mujhe is liye KHamoshi hai

shad hun aaj meri rasm-e-kafan-poshi hai

aaj duniya ke jhamelon se subukdoshi hai

waqif-e-raaz-e-haqiqat meri be-hoshi hai

aalam-e-hosh mera aalam-e-be-hoshi hai

dard-e-dil tu ne musibat mein sada sath diya

bhul jaana tujhe ehsan-faramoshi hai

jo hain aazad wo gulshan mein bahaaren luTen

meri qismat mein qafas se hi ham-aghoshi hai

lab pe kyon aae kabhi teri jafaon ka gila

hasil-e-ishq mera tarz-e-wafa-koshi hai

dekh hi lenge tujhe dekhne wale tere

kis liye parda hai kis baat pe ruposhi hai

jab mujhe hosh na tha hosh ki takiden thin

hosh mein hun to mujhe dawat-e-be-hoshi hai

hosh wala ye samajh jae to hosh aa jae

markaz-e-daera-e-hosh hi be-hoshi hai

hosh wale ye haqiqat tujhe malum nahin

hosh ki had se idhar aalam-e-be-hoshi hai

dil mera rah-e-tariqat mein wahin baiTh gaya

jab ye samjha ki tamanna bhi ghalat-koshi hai

miT gain dil se tamannaen ye achchha hi hua

ab mujhe yas-o-musibat se subukdoshi hai

kaba-o-dair ke jhagDe to abas hain 'sufi'

KHana-e-dil ke siwa har jagah ru-poshi hai