yaad jab guzri hui sham ka manzar aaya

yaad jab guzrī huī shaam kā manzar aayā

lauT kar taara sā ik dil ke ufuq par aayā

ātish-e-gul ko to shabnam hī samajh saktī hai

tū gayā aur faqat sair-e-chaman kar aayā

khiñch ga.ī zehn meñ ik vahm-o-yaqīñ kī tasvīr

haath meñ jab kisī fankār ke patthar aayā

ruḳh pe ik phuul khilā aañkh meñ motī chamkā

naam jab merā kabhī un ke laboñ par aayā

chal gayā mahfil-e-ḳhūbāñ meñ ġhazal kā jaadū

tere lahje kā jab andāz mayassar aayā

rind sab bhuul ga.e tishna-labī kā shikva

chashm-e-sāqī jo uThī daur meñ sāġhar aayā

merā ġham koī bhī duniyā meñ na samjhā 'rif.at'

gumrahī kā magar ilzām mire sar aayā

yaad jab guzri hui sham ka manzar aaya

lauT kar tara sa ek dil ke ufuq par aaya

aatish-e-gul ko to shabnam hi samajh sakti hai

tu gaya aur faqat sair-e-chaman kar aaya

khinch gai zehn mein ek wahm-o-yaqin ki taswir

hath mein jab kisi fankar ke patthar aaya

ruKH pe ek phul khila aankh mein moti chamka

nam jab mera kabhi un ke labon par aaya

chal gaya mahfil-e-KHuban mein ghazal ka jadu

tere lahje ka jab andaz mayassar aaya

rind sab bhul gae tishna-labi ka shikwa

chashm-e-saqi jo uThi daur mein saghar aaya

mera gham koi bhi duniya mein na samjha 'rifat'

gumrahi ka magar ilzam mere sar aaya