yaad kar wo husn-e-sabz aur ankhDiyan matwaliyan

yaad kar vo husn-e-sabz aur añkhḌiyāñ matvāliyāñ

kāTte haiñ ro hī ro sāvan kī rāteñ kāliyāñ

shab tasavvur bāñdh kar us jumbish-e-mizhgāñ kā vaah

ḳhud-baḳhud kis kis maze se ham ne chhaḌiyāñ khā liyāñ

dekheñ kyā un kī lachak us sā.ad-e-nāzuk baġhair

khīñchtī haiñ kyuuñ hameñ kāñToñ meñ gul kī Dāliyāñ

kuchh na kuchh kar baiThtā huuñ baat us ke bar-ḳhilāf

tā kisī sūrat vo de jhuñjhlā ke mujh ko gāliyāñ

mah asīr-e-hāla us kā dekh baalā kyuuñ na ho

ḳhanda-zan hoñ mahr par jis kī jaḌāv-bāliyāñ

shab ko jo us kā tasavvur bañdh gayā to ham ne bas

us ke mukhḌe kī balā.eñ sub.h tak kyā kyā liyāñ

vaqt-e-iz.hār-e-vafā mahfil meñ us kī jis se aañkh

mil ga.ī to bas vo sab bāteñ usī par Dhāliyāñ

barg-e-gul un ko kahūñ yā pāra-e-yāqūt vaah

dekhiyo bin paan khaa.e un laboñ kī lāliyāñ

kūcha-e-qātil ko gar musalaḳh kahūñ to hai bajā

jab na tab dekho to bahtī haiñ lahū kī nāliyāñ

ḳhūn-e-dil āñkhoñ meñ bhar aatā hai jab aatī hai yaad

vo mai-e-gul-rañg kī bhar bhar ke denī pyāliyāñ

tāk-jhāñk us kī kahūñ kyā maiñ ki tiflī meñ bhī thiiñ

us ke hāthoñ ghar kī dīvāroñ meñ har sū jāliyāñ

kaash 'jur.at' vasl kā din hove jaldī se nasīb

hijr kī to khaa.e jaatī haiñ ye rāteñ kāliyāñ

yaad kar wo husn-e-sabz aur ankhDiyan matwaliyan

kaTte hain ro hi ro sawan ki raaten kaliyan

shab tasawwur bandh kar us jumbish-e-mizhgan ka wah

KHud-baKHud kis kis maze se hum ne chhaDiyan kha liyan

dekhen kya un ki lachak us saad-e-nazuk baghair

khinchti hain kyun hamein kanTon mein gul ki Daliyan

kuchh na kuchh kar baiThta hun baat us ke bar-KHilaf

ta kisi surat wo de jhunjhla ke mujh ko galiyan

mah asir-e-haala us ka dekh baala kyun na ho

KHanda-zan hon mahr par jis ki jaDaw-baaliyan

shab ko jo us ka tasawwur bandh gaya to hum ne bas

us ke mukhDe ki balaen subh tak kya kya liyan

waqt-e-izhaar-e-wafa mahfil mein us ki jis se aankh

mil gai to bas wo sab baaten usi par Dhaaliyan

barg-e-gul un ko kahun ya para-e-yaqut wah

dekhiyo bin pan khae un labon ki laliyan

kucha-e-qatil ko gar musalaKH kahun to hai baja

jab na tab dekho to bahti hain lahu ki naliyan

KHun-e-dil aankhon mein bhar aata hai jab aati hai yaad

wo mai-e-gul-rang ki bhar bhar ke deni pyaliyan

tak-jhank us ki kahun kya main ki tifli mein bhi thin

us ke hathon ghar ki diwaron mein har su jaliyan

kash 'jurat' wasl ka din howe jaldi se nasib

hijr ki to khae jati hain ye raaten kaliyan