yaad tumhaari aai hai barsaton mein

yaad tumhārī aa.ī hai barsātoñ meñ

phuul khile zaḳhmoñ ke bhīgī rātoñ meñ

jis meñ koī ḳhuun na ho armānoñ kā

aisī koī raat nahīñ hai rātoñ meñ

chūmegā ik 'ālam rahtī duniyā tak

sang jo tum ne bheje haiñ sauġhātoñ meñ

un kā lahja un kī bāteñ kyā kahiye

vaqt guzar jaatā hai bātoñ bātoñ meñ

shahroñ kī rangīnī raas na aa.egī

sāthī merā chhūT gayā dehātoñ meñ

chādar meñ muñh Dhāñke yūñhī leTe haiñ

niiñd kahāñ aa.ī hai ujḌī rātoñ meñ

zaat ke andar kyoñ merā dam ghuTtā hai

zinda haiñ sab apnī apnī zātoñ meñ

daulat mere paas nahīñ lekin 'irfān'

maiñ ne ḳhud ko baañT diyā ḳhairātoñ meñ

yaad tumhaari aai hai barsaton mein

phul khile zaKHmon ke bhigi raaton mein

jis mein koi KHun na ho armanon ka

aisi koi raat nahin hai raaton mein

chumega ek 'alam rahti duniya tak

sang jo tum ne bheje hain saughaton mein

un ka lahja un ki baaten kya kahiye

waqt guzar jata hai baaton baaton mein

shahron ki rangini ras na aaegi

sathi mera chhuT gaya dehaton mein

chadar mein munh Dhanke yunhi leTe hain

nind kahan aai hai ujDi raaton mein

zat ke andar kyon mera dam ghuTta hai

zinda hain sab apni apni zaton mein

daulat mere pas nahin lekin 'irfan'

main ne KHud ko banT diya KHairaaton mein