yaadash-ba-KHair saya-fagan ghar hi aur tha

yādash-ba-ḳhair sāya-fagan ghar hī aur thā

lauTā musāfirat se to manzar hī aur thā

dekhā ajiib rabt anāsir ke darmiyāñ

badlā jo āsmāñ to samundar hī aur thā

phir yuuñ huā ki apne hī mehvar se haT ga.ī

varna to is zamīñ kā muqaddar hī aur thā

vo yuuñ lagā hai turra-o-dastār ke baġhair

jaise miyān-e-dosh vahāñ sar hī aur thā

vo naunihāl jis kī numū hai mirā lahū

niklā jo mere qad se to paikar hī aur thā

asbāb-o-zād-e-rāh tale dafan ho gayā

pahne thā jo bagūle vo lashkar hī aur thā

mamnūn-e-iltifāt-e-tavajjoh rahā hai jo

ik shaḳhs baiThā mere barābar hī aur thā

'maz.har' ko pūchhte ho to bas itnā jaan lo

biite hue dinoñ kā vo 'maz.har' hī aur thā

yaadash-ba-KHair saya-fagan ghar hi aur tha

lauTa musafirat se to manzar hi aur tha

dekha ajib rabt anasir ke darmiyan

badla jo aasman to samundar hi aur tha

phir yun hua ki apne hi mehwar se haT gai

warna to is zamin ka muqaddar hi aur tha

wo yun laga hai turra-o-dastar ke baghair

jaise miyan-e-dosh wahan sar hi aur tha

wo naunihaal jis ki numu hai mera lahu

nikla jo mere qad se to paikar hi aur tha

asbab-o-zad-e-rah tale dafan ho gaya

pahne tha jo bagule wo lashkar hi aur tha

mamnun-e-iltifat-e-tawajjoh raha hai jo

ek shaKHs baiTha mere barabar hi aur tha

'mazhar' ko puchhte ho to bas itna jaan lo

bite hue dinon ka wo 'mazhar' hi aur tha