yaadon ka shahr-e-dil mein charaghan nahin raha

yādoñ kā shahr-e-dil meñ charāġhāñ nahīñ rahā

kyā koī ġham hī sho.ala-ba-dāmāñ nahīñ rahā

ab e'tirāf-e-ahd-e-vafā kar rahe haiñ vo

jab e.atibār-e-umr-e-gurezāñ nahīñ rahā

nikle kuchh aur ābla-pā.ī kī ab sabīl

sahrā meñ koī ḳhār-e-muġhīlāñ nahīñ rahā

baḳhiya-garī-e-dil ke tasavvur meñ gum hue

goyā ḳhayāl-e-jumbish-e-mizhgāñ nahīñ rahā

ye soch kar ki ḳhūgar-e-ġham ho na jā.ūñ maiñ

vo sargirāñ huā sitam arzāñ nahīñ rahā

āzār-e-hijr apnī jagah mustaqil magar

dil mujh se tere qurb kā ḳhvāhāñ nahīñ rahā

yād-e-ḳhudā hī ka.aba-e-dil meñ basā.iye

ab ek but bhī dushman-e-īmāñ nahīñ rahā

imkān-e-vasl-e-yār to 'aḳhgar' kabhī na thā

āzār-e-hijr-e-yār kā armāñ nahīñ rahā

yaadon ka shahr-e-dil mein charaghan nahin raha

kya koi gham hi shoala-ba-daman nahin raha

ab e'tiraf-e-ahd-e-wafa kar rahe hain wo

jab eatibar-e-umr-e-gurezan nahin raha

nikle kuchh aur aabla-pai ki ab sabil

sahra mein koi KHar-e-mughilan nahin raha

baKHiya-gari-e-dil ke tasawwur mein gum hue

goya KHayal-e-jumbish-e-mizhgan nahin raha

ye soch kar ki KHugar-e-gham ho na jaun main

wo sargiran hua sitam arzan nahin raha

aazar-e-hijr apni jagah mustaqil magar

dil mujh se tere qurb ka KHwahan nahin raha

yaad-e-KHuda hi kaba-e-dil mein basaiye

ab ek but bhi dushman-e-iman nahin raha

imkan-e-wasl-e-yar to 'aKHgar' kabhi na tha

aazar-e-hijr-e-yar ka arman nahin raha