yaadon ke ambar lage the

yādoñ ke ambār lage the

ḳhālī packet bhare paḌe the

jaane kaun sā dukh haavī thā

jaane kyoñ itnā hañste the

us bezār galī se ho kar

ham aksar aate jaate the

ḳhvāboñ ke bosīda manzar

āñkhoñ āñkhoñ jhāñk rahe the

āvāzoñ ke gūñge lashkar

raat kā siina chiir rahe the

gul-dānoñ ko yaad nahīñ ab

pahle kaun se phuul saje the

ham bhī pāgal the jo tum se

apnā jī halkā karte the

kaisī vahshat-nāk fazā thī

chaa.e ke ḳhālī cup kahte the

merī is vīrān-sarā tak

kuchh saa.e pīchhā karte the

kitnī purānī ḳhabreñ thī vo

jin ko ham taaza karte the

afsānoñ kī bhiiḌ meñ kho kar

ham ḳhud ko DhūñDā karte the

yaadon ke ambar lage the

KHali packet bhare paDe the

jaane kaun sa dukh hawi tha

jaane kyon itna hanste the

us bezar gali se ho kar

hum aksar aate jate the

KHwabon ke bosida manzar

aankhon aankhon jhank rahe the

aawazon ke gunge lashkar

raat ka sina chir rahe the

gul-danon ko yaad nahin ab

pahle kaun se phul saje the

hum bhi pagal the jo tum se

apna ji halka karte the

kaisi wahshat-nak faza thi

chae ke KHali cup kahte the

meri is viran-sara tak

kuchh sae pichha karte the

kitni purani KHabren thi wo

jin ko hum taza karte the

afsanon ki bhiD mein kho kar

hum KHud ko DhunDa karte the