yaadon ko dhuan kar ke uDa kyon nahin dete

yādoñ ko dhuāñ kar ke uḌā kyoñ nahīñ dete

tāqat hai to tum mujh ko bhulā kyoñ nahīñ dete

tum mujh ko ḳhatāoñ kī sazā kyoñ nahīñ dete

is 'ahd meñ jiine kī du'ā kyoñ nahīñ dete

ghanghor añdherā hai agar madd-e-muqābil

parda ruḳh-e-raushan se uThā kyoñ nahīñ dete

nāqis jinheñ lagtā hai har ik she'r tumhārā

tum un kī ġhazal un ko sunā kyoñ nahīñ dete

kahtī hai saḳhī-ibn-e-saḳhī aap ko duniyā

phir aap mujhe haq bhī mirā kyoñ nahīñ dete

dariyā kī ḳhamoshī agar achchhī nahīñ lagtī

paanī meñ koī chiiz girā kyoñ nahīñ dete

sajda to sabhī karte haiñ rasmoñ ke butoñ ko

sar tum bhī 'habīb' apnā jhukā kyoñ nahīñ dete

yaadon ko dhuan kar ke uDa kyon nahin dete

taqat hai to tum mujh ko bhula kyon nahin dete

tum mujh ko KHataon ki saza kyon nahin dete

is 'ahd mein jine ki du'a kyon nahin dete

ghanghor andhera hai agar madd-e-muqabil

parda ruKH-e-raushan se uTha kyon nahin dete

naqis jinhen lagta hai har ek she'r tumhaara

tum un ki ghazal un ko suna kyon nahin dete

kahti hai saKHi-ibn-e-saKHi aap ko duniya

phir aap mujhe haq bhi mera kyon nahin dete

dariya ki KHamoshi agar achchhi nahin lagti

pani mein koi chiz gira kyon nahin dete

sajda to sabhi karte hain rasmon ke buton ko

sar tum bhi 'habib' apna jhuka kyon nahin dete