yaadon pe koi pahra lagaya nahin gaya

yādoñ pe koī pahra lagāyā nahīñ gayā

bichhḌā magar vo yaar bhulāyā nahīñ gayā

ashkoñ ne kah diyā thā magar hoñT chup rahe

āñkhoñ se koī raaz chhupāyā nahīñ gayā

pūchhā kisī ne yaar mohabbat meñ kyā huā

sach sach kisī ko yaar batāyā nahīñ gayā

kaise ujaḌ gayā thā baġhīcha bahār meñ

qissa kisī ko yaar sunāyā nahīñ gayā

sāgar kī ret par hī banāyā huā mahal

hāthoñ se apne yaar miTāyā nahīñ gayā

duniyā ke saare log rulāte rahe hameñ

ham se kisī kā dil bhī dukhāyā nahīñ gayā

kaise diloñ ke zaḳhm dikhāte ham aap ko

ham ne sunā diyā hai dikhāyā nahīñ gayā

us ne bhī muñh ko pher liyā aap se 'dharam'

ham se bhī haath yaar milāyā nahīñ gayā

yaadon pe koi pahra lagaya nahin gaya

bichhDa magar wo yar bhulaya nahin gaya

ashkon ne kah diya tha magar honT chup rahe

aankhon se koi raaz chhupaya nahin gaya

puchha kisi ne yar mohabbat mein kya hua

sach sach kisi ko yar bataya nahin gaya

kaise ujaD gaya tha baghicha bahaar mein

qissa kisi ko yar sunaya nahin gaya

sagar ki ret par hi banaya hua mahal

hathon se apne yar miTaya nahin gaya

duniya ke sare log rulate rahe hamein

hum se kisi ka dil bhi dukhaya nahin gaya

kaise dilon ke zaKHm dikhate hum aap ko

hum ne suna diya hai dikhaya nahin gaya

us ne bhi munh ko pher liya aap se 'dharam'

hum se bhi hath yar milaya nahin gaya