yan hum ko jis ne mara malum ho rahega

yaañ ham ko jis ne maarā ma.alūm ho rahegā

mahshar meñ ḳhuuñ hamārā ma.alūm ho rahegā

go phuul phuul kar ab to dekhtī hai bulbul

gulshan kā par nazārā ma.alūm ho rahegā

jab bahr-e-ġham meñ Duubā de chhoḌ dast-o-pā ko

āḳhir tujhe kinārā ma.alūm ho rahegā

ai sabr dam-ba-dam ab dard-o-alam fuzūñ hai

jitnā hai dil kā yaarā ma.alūm ho rahegā

ai āftāb-e-mahshar kholūñ huuñ daaġh dil kā

chamkā agar ye taarā ma.alūm ho rahegā

sad-sher āshiqoñ kā hone lagā vafūr ab

sab hausla tumhārā ma.alūm ho rahegā

naqsh-e-qadam se āḳhir terī galī meñ pyāre

jis kā huā guzārā ma.alūm ho rahegā

afsos raaz dil kā jāsūs sun ga.e haiñ

qissa ab us ko saarā ma.alūm ho rahegā

poshīda go hai tujh par ahvāl mere dil kā

hai ye to āshkārā ma.alūm ho rahegā

nā-chār kū-ba-kū ab tahqīq karne phiriye

kuchh dard-e-dil kā chārā ma.alūm ho rahegā

pinhāñ hai ab to lekin marne ke ba.ad 'jur.at'

dard-e-darūñ hamārā ma.alūm ho rahegā

yan hum ko jis ne mara malum ho rahega

mahshar mein KHun hamara malum ho rahega

go phul phul kar ab to dekhti hai bulbul

gulshan ka par nazara malum ho rahega

jab bahr-e-gham mein Duba de chhoD dast-o-pa ko

aaKHir tujhe kinara malum ho rahega

ai sabr dam-ba-dam ab dard-o-alam fuzun hai

jitna hai dil ka yara malum ho rahega

ai aaftab-e-mahshar kholun hun dagh dil ka

chamka agar ye tara malum ho rahega

sad-sher aashiqon ka hone laga wafur ab

sab hausla tumhaara malum ho rahega

naqsh-e-qadam se aaKHir teri gali mein pyare

jis ka hua guzara malum ho rahega

afsos raaz dil ka jasus sun gae hain

qissa ab us ko sara malum ho rahega

poshida go hai tujh par ahwal mere dil ka

hai ye to aashkara malum ho rahega

na-chaar ku-ba-ku ab tahqiq karne phiriye

kuchh dard-e-dil ka chaara malum ho rahega

pinhan hai ab to lekin marne ke baad 'jurat'

dard-e-darun hamara malum ho rahega