yan hijr mein mahshar dil-e-mail ne dikhaya

yaañ hijr meñ mahshar dil-e-mā.il ne dikhāyā

kānoñ se jo sunte the use dil ne dikhāyā

majnūñ kā uThā parda-e-hastī idhar aur aah

āñchal na use sāhib-e-mahmil ne dikhāyā

ham ro paḌe dekh apnī is āġhosh-e-tahī ko

gird apne jo haala mah-e-kāmil ne dikhāyā

gar gashta hue ham na khulā zulf kā uqda

kyā pech ab is uqda-e-mushkil ne dikhāyā

patthar ko huā zaḳhm-e-jigar se maraz-e-sil

jab zaḳhm-e-jigar aap ke bismil ne dikhāyā

juuñ reg-e-ravāñ bādiya-paimā.ī hai tā-umr

muñh ham ko na āsā.ish-e-manzil ne dikhāyā

kab ahl-e-saḳhāvat se ho taqdīr ke bin faiz

ham samjhe lab-e-ḳhushk jo sāhil ne dikhāyā

ghuñghaT se ayaañ saaf hai us yaar kā jalva

ainak kā mazā parda-e-hā.il ne dikhāyā

us zulf kī tāsīr se aañsū haiñ siyah-posh

sāmān-e-alam ashk kī mahfil ne dikhāyā

'daula' ye ġhazal ham ne sunā.ī to ḳhajil ho

dīvān na phir āqil-o-ġhāfil ne dikhāyā

yan hijr mein mahshar dil-e-mail ne dikhaya

kanon se jo sunte the use dil ne dikhaya

majnun ka uTha parda-e-hasti idhar aur aah

aanchal na use sahib-e-mahmil ne dikhaya

hum ro paDe dekh apni is aaghosh-e-tahi ko

gird apne jo haala mah-e-kaamil ne dikhaya

gar gashta hue hum na khula zulf ka uqda

kya pech ab is uqda-e-mushkil ne dikhaya

patthar ko hua zaKHm-e-jigar se maraz-e-sil

jab zaKHm-e-jigar aap ke bismil ne dikhaya

jun reg-e-rawan baadiya-paimai hai ta-umr

munh hum ko na aasaish-e-manzil ne dikhaya

kab ahl-e-saKHawat se ho taqdir ke bin faiz

hum samjhe lab-e-KHushk jo sahil ne dikhaya

ghunghaT se ayan saf hai us yar ka jalwa

ainak ka maza parda-e-hail ne dikhaya

us zulf ki tasir se aansu hain siyah-posh

saman-e-alam ashk ki mahfil ne dikhaya

'daula' ye ghazal hum ne sunai to KHajil ho

diwan na phir aaqil-o-ghafil ne dikhaya