yar ek lazzat-e-didar se aage na gae

yaar ik lazzat-e-dīdār se aage na ga.e

ya.anī zulf-o-lab-o-ruḳhsār se aage na ga.e

josh meñ sūrat-e-nādār jo aate haiñ nazar

hosh meñ shikva-e-zar-dār se aage na ga.e

thā vahīñ kū-e-muġhāñ chār-qadam par afsos

kyā kiyā ham ne ki bāzār se aage na ga.e

ġham jo āzār thā ik daulat-e-bedār hai ab

ham to is daulat-e-bedār se aage na ga.e

shab ne jalva kiyā do-chār tarab-ḳhānoñ meñ

sub.h ke jalve bhī dīvār se aage na ga.e

zulf kī chhāñv meñ so.e na ḳhatar meñ jaage

haa.e vo log jo begār se aage na ga.e

āsmāñ toḌ ke aadam to zamīñ tak aayā

mehr-o-mah gardish-e-parkār se aage na ga.e

yar ek lazzat-e-didar se aage na gae

yani zulf-o-lab-o-ruKHsar se aage na gae

josh mein surat-e-nadar jo aate hain nazar

hosh mein shikwa-e-zar-dar se aage na gae

tha wahin ku-e-mughan chaar-qadam par afsos

kya kiya hum ne ki bazar se aage na gae

gham jo aazar tha ek daulat-e-bedar hai ab

hum to is daulat-e-bedar se aage na gae

shab ne jalwa kiya do-chaar tarab-KHanon mein

subh ke jalwe bhi diwar se aage na gae

zulf ki chhanw mein soe na KHatar mein jage

hae wo log jo begar se aage na gae

aasman toD ke aadam to zamin tak aaya

mehr-o-mah gardish-e-parkar se aage na gae