yar ko mahrum-e-tamasha kiya

yaar ko mahrūm-e-tamāshā kiyā

marg-e-mufājāt ne ye kyā kiyā

aap jo hañste rahe shab bazm meñ

jaan ko dushman kī maiñ royā kiyā

arz-e-tamannā se rahā be-qarār

shab vo mujhe maiñ use chheḌā kiyā

sard huā dil vo hai ġhairoñ se garm

shole ne ulTā mujhe ThanDā kiyā

mehr-e-qamar kā hai ab un ko gumān

āh-e-falak-sair ne ye kyā kiyā

un ko mohabbat hī meñ shak paḌ gayā

Dar se jo shikva na adū kā kiyā

dekhiye ab kaun mile ḳhaak meñ

yaar ne gardūñ se kuchh iimā kiyā

hasrat-e-āġhosh hai kyuuñ ham-kanār

ġhair se kab us ne kinārā kiyā

chashm-e-ināyat se bachī jaañ mujhe

nargis-e-bīmār ne achchhā kiyā

ġhair hī ko chāheñge ab 'sheftā'

kuchh to hai jo yaar ne aisā kiyā

yar ko mahrum-e-tamasha kiya

marg-e-mufajat ne ye kya kiya

aap jo hanste rahe shab bazm mein

jaan ko dushman ki main roya kiya

arz-e-tamanna se raha be-qarar

shab wo mujhe main use chheDa kiya

sard hua dil wo hai ghairon se garm

shole ne ulTa mujhe ThanDa kiya

mehr-e-qamar ka hai ab un ko guman

aah-e-falak-sair ne ye kya kiya

un ko mohabbat hi mein shak paD gaya

Dar se jo shikwa na adu ka kiya

dekhiye ab kaun mile KHak mein

yar ne gardun se kuchh ima kiya

hasrat-e-aghosh hai kyun ham-kanar

ghair se kab us ne kinara kiya

chashm-e-inayat se bachi jaan mujhe

nargis-e-bimar ne achchha kiya

ghair hi ko chahenge ab 'shefta'

kuchh to hai jo yar ne aisa kiya