yaro kaisi basti hai ye kaise hain diwane log

yaaro kaisī bastī hai ye kaise haiñ dīvāne log

aapas meñ haiñ dast-o-garebāñ sab jaane pahchāne log

apne man ke saañp kā hī kuchh ḳhauf samāyā rahtā hai

jab hī apne saa.e se haiñ aaj lage Dar jaane log

kuchh to vaqt kī āñdhī ne hī dil kī raakh kuredī hai

kuchh nā-samjhī se bhī apnī aag lage bhaḌkāne log

nafrat ke ik naag ne goyā sab ko hī Das rakkhā hai

kal ham ko pahchān rahe the aaj nahīñ pahchāne log

kal tak is DyoDhī par aakar dars-e-vafā le jaate the

aah isī dar par aa.e haiñ aaj hameñ samjhāne log

kyā pūchho ho kyā batlā.eñ dil par kyā kuchh biitī hai

kal tak sab apne hī the kyuuñ aaj hue begāne log

apne dil meñ ham kyā kyā tūfān chhupā.e baiThe haiñ

kyā jāneñge kyā samjheñge ye ġham se begāne log

kal tak jehd-e-musalsal ko hī apnā shi'ār banāyā thā

shīsh-mahal ke sapnoñ meñ hī aaj lage kho jaane log

shaiḳh-o-haram ke jhagḌoñ se to dil kuchh itnā uub gayā

dair-o-haram ko chhoḌ ke ab to aa baiThe maiḳhāne log

kal tak ham hī nāz-e-vatan the ham hī shān-e-gulshan the

nang-e-vatan gardān ke ham ko aaj lage Thukrāne log

ik ehsās kī chingārī se dil meñ aag vo bhaḌkī hai

chehre kī rangat se dil kā haal lage batlāne log

ḳhushbū dil ke zaḳhmoñ kī phir aaj 'ziyā' ke phailī hai

dekho us ke paañv meñ beḌī aa.e haiñ pahnāne log

yaro kaisi basti hai ye kaise hain diwane log

aapas mein hain dast-o-gareban sab jaane pahchane log

apne man ke sanp ka hi kuchh KHauf samaya rahta hai

jab hi apne sae se hain aaj lage Dar jaane log

kuchh to waqt ki aandhi ne hi dil ki rakh kuredi hai

kuchh na-samjhi se bhi apni aag lage bhaDkane log

nafrat ke ek nag ne goya sab ko hi Das rakkha hai

kal hum ko pahchan rahe the aaj nahin pahchane log

kal tak is DyoDhi par aakar dars-e-wafa le jate the

aah isi dar par aae hain aaj hamein samjhane log

kya puchho ho kya batlaen dil par kya kuchh biti hai

kal tak sab apne hi the kyun aaj hue begane log

apne dil mein hum kya kya tufan chhupae baiThe hain

kya jaanenge kya samjhenge ye gham se begane log

kal tak jehd-e-musalsal ko hi apna shi'ar banaya tha

shish-mahal ke sapnon mein hi aaj lage kho jaane log

shaiKH-o-haram ke jhagDon se to dil kuchh itna ub gaya

dair-o-haram ko chhoD ke ab to aa baiThe maiKHane log

kal tak hum hi naz-e-watan the hum hi shan-e-gulshan the

nang-e-watan gardan ke hum ko aaj lage Thukrane log

ek ehsas ki chingari se dil mein aag wo bhaDki hai

chehre ki rangat se dil ka haal lage batlane log

KHushbu dil ke zaKHmon ki phir aaj 'ziya' ke phaili hai

dekho us ke panw mein beDi aae hain pahnane log