yaro tumhein KHabar nahin kitna bura hun main

yaaro tumheñ ḳhabar nahīñ kitnā burā huuñ maiñ

kamzoriyoñ ko apnī faqat jāntā huuñ maiñ

mujh ko kabhī gunāh kā mauqa nahīñ milā

aisā bhī ab nahīñ ki baḌā pārsā huuñ maiñ

apnā hī aks dekhtī hai mujh meñ terī aañkh

ai ḳhush-gumān dost kahāñ bā-safā huuñ maiñ

pal-bhar bhī us pe dil mirā ġhālib nahīñ huā

kab se anā ke saath nabard-āzmā huuñ maiñ

logoñ se merā fāsla kuchh aur baḌh gayā

shohrat ke saath aur bhī tanhā huā huuñ maiñ

har lahza mujh se kahtā hai andar kā mohtasib

matlab-parast ahd-shikan bevafā huuñ maiñ

raushan kiyā thā dil meñ kabhī aarzū kā diip

'kāshif' usī kī aag meñ ab jal rahā huuñ maiñ

yaro tumhein KHabar nahin kitna bura hun main

kamzoriyon ko apni faqat jaanta hun main

mujh ko kabhi gunah ka mauqa nahin mila

aisa bhi ab nahin ki baDa parsa hun main

apna hi aks dekhti hai mujh mein teri aankh

ai KHush-guman dost kahan ba-safa hun main

pal-bhar bhi us pe dil mera ghaalib nahin hua

kab se ana ke sath nabard-azma hun main

logon se mera fasla kuchh aur baDh gaya

shohrat ke sath aur bhi tanha hua hun main

har lahza mujh se kahta hai andar ka mohtasib

matlab-parast ahd-shikan bewafa hun main

raushan kiya tha dil mein kabhi aarzu ka dip

'kashif' usi ki aag mein ab jal raha hun main