yas kahti hai ujale se andhere ban ja

yaas kahtī hai ujāle se añdhere ban jā

aas kā hukm hai chāhat kā saverā ban jā

husn-e-pur-kaif se kar raam dil-e-ahl-e-zamāñ

gher le saarā jahāñ zulf kā gherā ban jā

kyā sitam hai ki mire sāda-o-bekas dil ko

havas-e-māl kā farmāñ hai luTerā ban jā

maiñ ne kab tujh se kahā tark-e-tamannā kar ke

ai dil-e-zār kisī bhuut kā Derā ban jā

thāmnā hai tujhe ik dushman-e-bad-tīnat ko

parcham-e-hind shujā'at kā pharerā ban jā

be-niyāzāna guzar jāda-e-rang-o-bū se

ai mire jazba-e-dil jog kā pherā ban jā

zarb duniyā pe lagā kar ise tābe' kar le

is kā dil jiit añdhere meñ saverā ban jā

zaḳhmī nāgin kī tarah mārtī hai phan duniyā

is se bachne ke liye ek saperā ban jā

machhliyāñ DhūñDte motī bhī mayassar hoñge

ghuum dariyāoñ meñ bebāk machherā ban jā

'krishn-mohan' ke dukhī man sabhī bandhan taj kar

jis meñ sukh-chain ho vo rain-baserā ban jā

yas kahti hai ujale se andhere ban ja

aas ka hukm hai chahat ka sawera ban ja

husn-e-pur-kaif se kar ram dil-e-ahl-e-zaman

gher le sara jahan zulf ka ghera ban ja

kya sitam hai ki mere sada-o-bekas dil ko

hawas-e-mal ka farman hai luTera ban ja

main ne kab tujh se kaha tark-e-tamanna kar ke

ai dil-e-zar kisi bhut ka Dera ban ja

thamna hai tujhe ek dushman-e-bad-tinat ko

parcham-e-hind shuja'at ka pharera ban ja

be-niyazana guzar jada-e-rang-o-bu se

ai mere jazba-e-dil jog ka phera ban ja

zarb duniya pe laga kar ise tabe' kar le

is ka dil jit andhere mein sawera ban ja

zaKHmi nagin ki tarah marti hai phan duniya

is se bachne ke liye ek sapera ban ja

machhliyan DhunDte moti bhi mayassar honge

ghum dariyaon mein bebak machhera ban ja

'krishn-mohan' ke dukhi man sabhi bandhan taj kar

jis mein sukh-chain ho wo rain-basera ban ja