yas ki kohr mein lipTa hua chehra dekha

yaas kī kohr meñ lipTā huā chehra dekhā

jism kā ek bigaḌtā huā ḳhāka dekhā

apnī sūrat bhī na pahchān sakī aañkh mirī

muddatoñ ba.ad jo maiñ ne kabhī shīsha dekhā

shahr-e-pur-haul meñ ab ke ye ajab manzar thā

sañg kushāda thā magar sañg ko basta dekhā

maiñ bhī gum-sum thā koī baat na karne paayā

us ke hoñToñ pe bhī jaise koī pahrā dekhā

terā qurb ek tamannā so tamannā hī rahī

hāsil-e-umr yahī hai tirā rasta dekhā

kyā ajab raakh se paidā ho koī qasr-e-azīm

ham ne ātish meñ bhī gulzār kā naqsha dekhā

maiñ hī ġhamgīn nahīñ tark-e-ta.alluq pe 'kamāl'

vo bhī nāshād thā us ko bhī fasurda dekhā

yas ki kohr mein lipTa hua chehra dekha

jism ka ek bigaDta hua KHaka dekha

apni surat bhi na pahchan saki aankh meri

muddaton baad jo main ne kabhi shisha dekha

shahr-e-pur-haul mein ab ke ye ajab manzar tha

sang kushada tha magar sang ko basta dekha

main bhi gum-sum tha koi baat na karne paya

us ke honTon pe bhi jaise koi pahra dekha

tera qurb ek tamanna so tamanna hi rahi

hasil-e-umr yahi hai tera rasta dekha

kya ajab rakh se paida ho koi qasr-e-azim

hum ne aatish mein bhi gulzar ka naqsha dekha

main hi ghamgin nahin tark-e-talluq pe 'kamal'

wo bhi nashad tha us ko bhi fasurda dekha