yas-o-gham mein ai milan ki aas ke aansu chamak

yās-o-ġham meñ ai milan kī aas ke aañsū chamak

'aql kī zulmat meñ ai ehsās ke jugnū chamak

dil rahīn-e-yās hai mahsūs hotī haiñ udaas

chāñdnī shoḳhī hayā shabnam adā ḳhushbū chamak

phīkī phīkī be-maza be-nūr sī hai zindagī

'aql kī shoḳhī damak ai husn ke jaadū chamak

apnī chanchaltā se mere pyaar ko chamkā ga.ī

tere albele nashīle ruup kī dil-jū chamak

haar kar tadbīr ne taqdīr se kah hī diyā

maan bhī jā maiñ to chamkī huuñ bahut ab tū chamak

zindagī meñ ho kabhī to koī hangāma bapā

jazba-e-āvāra-o-shoḳh-e-dil-e-yaksū chamak

aise chamkātā hai qalb-e-zār ko terā ḳhayāl

jaise dasht-e-tīra ko de dīda-e-āhū chamak

chīrnā hai be-hisī kī gahrī zulmat ko tujhe

aur abhī is taur se ai dashna-e-abrū chamak

tere tevar zevar-e-ehsās haiñ almās haiñ

yaad ke kohre meñ soz-o-kāvish-e-pahlū chamak

ai fusūn-e-rāz jalvat-sāz ai ḳhalvat-navāz

pyaar kī āvāz pā-e-nāz ke ghuñghrū chamak

'krishn-mohan' ke dukhī man par añdherā chhā gayā

ruup kī dhuup ai birah ke dard kī daarū chamak

yas-o-gham mein ai milan ki aas ke aansu chamak

'aql ki zulmat mein ai ehsas ke jugnu chamak

dil rahin-e-yas hai mahsus hoti hain udas

chandni shoKHi haya shabnam ada KHushbu chamak

phiki phiki be-maza be-nur si hai zindagi

'aql ki shoKHi damak ai husn ke jadu chamak

apni chanchalta se mere pyar ko chamka gai

tere albele nashile rup ki dil-ju chamak

haar kar tadbir ne taqdir se kah hi diya

man bhi ja main to chamki hun bahut ab tu chamak

zindagi mein ho kabhi to koi hangama bapa

jazba-e-awara-o-shoKH-e-dil-e-yaksu chamak

aise chamkata hai qalb-e-zar ko tera KHayal

jaise dasht-e-tira ko de dida-e-ahu chamak

chirna hai be-hisi ki gahri zulmat ko tujhe

aur abhi is taur se ai dashna-e-abru chamak

tere tewar zewar-e-ehsas hain almas hain

yaad ke kohre mein soz-o-kawish-e-pahlu chamak

ai fusun-e-raaz jalwat-saz ai KHalwat-nawaz

pyar ki aawaz pa-e-naz ke ghunghru chamak

'krishn-mohan' ke dukhi man par andhera chha gaya

rup ki dhup ai birah ke dard ki daru chamak