yas-o-hasrat ki zarb kari hai

yās-o-hasrat kī zarb kaarī hai

har tabassum meñ be-qarārī hai

vaqt se koī bach nahīñ saktā

vaqt sab se baḌā shikārī hai

ik mohabbat pe zo'm thā ham ko

in dinoñ ye bhī kārobārī hai

zabt kam hai na kam ġham-e-daurāñ

baar ke saath burdbārī hai

'ishq apnā mizāj rakhtā hai

be-ḳhudī hai na hoshiyārī hai

lene vaalā yahāñ tavangar hai

dene vaalā yahāñ bhikārī hai

dhuul uḌne lagī hai āñkhoñ meñ

shāyad ab āñsuoñ kī baarī hai

tang-dastī meñ aap kī yādeñ

qaht meñ jaise buuñd baarī hai

kis ne toḌā hai dil tirā 'irfān'

kyoñ tabī'at meñ inkisārī hai

yas-o-hasrat ki zarb kari hai

har tabassum mein be-qarari hai

waqt se koi bach nahin sakta

waqt sab se baDa shikari hai

ek mohabbat pe zo'm tha hum ko

in dinon ye bhi karobari hai

zabt kam hai na kam gham-e-dauran

bar ke sath burdbari hai

'ishq apna mizaj rakhta hai

be-KHudi hai na hoshiyari hai

lene wala yahan tawangar hai

dene wala yahan bhikari hai

dhul uDne lagi hai aankhon mein

shayad ab aansuon ki bari hai

tang-dasti mein aap ki yaaden

qaht mein jaise bund bari hai

kis ne toDa hai dil tera 'irfan'

kyon tabi'at mein inkisari hai