yad-e-baiza ruKH-e-yusuf dil-e-mansur hote hain

yad-e-baizā ruḳh-e-yūsuf dil-e-mansūr hote haiñ

jo tū dekhe to zarre bhī charāġh-e-tūr hote haiñ

gar is nukte ko kuchh samjhā to sarv-e-pā-ba-gil samjhā

ki bāġh-e-dahr meñ āzād bhī majbūr hote haiñ

shabāb-e-mast kī Dhaltī huī tārīk rātoñ par

sahar hañstī hai yā mū-e-siyah kāfūr hote haiñ

ho sadd-e-rāh kyoñ tere liye sang-e-vajūd apnā

tū bebākāna pā-e-nāz uThā ham duur hote haiñ

ye mai-ḳhāna hai ai shaiḳh-e-haram laġhzīda-pā ho jā

ki ik Thokar se paidā is jagah sau tuur hote haiñ

sar-e-jamshed ko ḳhisht-e-ḳhum-e-sahbā se Takrā deñ

gadā-e-mai-kada bhī kis qadar maġhrūr hote haiñ

hiqārat kī nazar se ḳhirqa-poshoñ ko na dekh ai dil

ki aksar in meñ apne ahd ke mansūr hote haiñ

muhayyā sang-e-dar ai nā-murād-e-zindagī kar le

ki jiine kī tarah marne ke bhī dastūr hote haiñ

na ho ḳhūn-e-jigar jin meñ na āvāz-e-shikast-e-dil

vo aañsū huuñ ki naale 'faiz' nā-manzūr hote haiñ

yad-e-baiza ruKH-e-yusuf dil-e-mansur hote hain

jo tu dekhe to zarre bhi charagh-e-tur hote hain

gar is nukte ko kuchh samjha to sarw-e-pa-ba-gil samjha

ki bagh-e-dahr mein aazad bhi majbur hote hain

shabab-e-mast ki Dhalti hui tarik raaton par

sahar hansti hai ya mu-e-siyah kafur hote hain

ho sadd-e-rah kyon tere liye sang-e-wajud apna

tu bebakana pa-e-naz uTha hum dur hote hain

ye mai-KHana hai ai shaiKH-e-haram laghzida-pa ho ja

ki ek Thokar se paida is jagah sau tur hote hain

sar-e-jamshed ko KHisht-e-KHum-e-sahba se Takra den

gada-e-mai-kada bhi kis qadar maghrur hote hain

hiqarat ki nazar se KHirqa-poshon ko na dekh ai dil

ki aksar in mein apne ahd ke mansur hote hain

muhayya sang-e-dar ai na-murad-e-zindagi kar le

ki jine ki tarah marne ke bhi dastur hote hain

na ho KHun-e-jigar jin mein na aawaz-e-shikast-e-dil

wo aansu hun ki nale 'faiz' na-manzur hote hain