yagana un ka begana hai begana yagana hai

yagāna un kā begāna hai begāna yagāna hai

ḳhudā.ī se nirālā un butoñ kā kārḳhāna hai

nigāh-e-nāz se said apnā murġh-e-dil nahīñ hotā

kabhī uḌtā nahīñ nāvak se jo vo ye nishāna hai

udhar kaliyāñ chaTaktī haiñ idhar shor-e-anādil hai

chaman meñ kis kī aamad hai ye kaisā shādiyāna hai

junūñ ne kī hai qabr-e-qais kī is tarah ārā.ish

charāġh-e-ġhūl raushan haiñ bagūla shāmiyāna hai

hamārā hāl-e-dil sunñe se dil par choT lagtī hai

uḌā detā hai niiñd āñkhoñ se jo vo ye fasāna hai

phalā-phūlā na kisht-e-dahr meñ tuḳhm-e-umīd-e-dil

nahīñ āgāh jo nashv-o-numā se ye vo daana hai

jahāñ koshish zarā kī naqd-e-mazmūn us se haath aayā

zamīn-e-sher meñ bhī dafn kyā koī ḳhazāna hai

bayāñ kartā hai mere vasf aksar apnī mahfil meñ

ye us ayyār kī mujh se lagāvaT ġhā.ebāna hai

navā-sanjī se merī bulbuloñ ke hosh uḌte haiñ

guloñ se bhī kahīñ rañgīñ sivā merā tarāna hai

tū mushtāqoñ se apne chashm-poshī roz kartā hai

tire dīdār kī daulat bhī qārūñ kā ḳhazāna hai

urūs-e-marg se shādī huī hai ḳhuuñ se lab tar hai

gale meñ ye shahīd-e-nāz ke joḌā shahāna hai

kal un se pūchh leñge karte ho ab bhī dil-āzārī

jahāñ tak chāheñ kar leñ zulm aaj un kā zamāna hai

hameñ baḳhshe na baḳhshe daḳhl yā marzī meñ mālik kī

vagarna us kī rahmat ko to darkār ik bahāna hai

jabīñ-sā rahte haiñ har-dam malak jinn-o-bashar to kyā

dar-e-daulat sarā-e-yār kā vo āstāna hai

anādil kī sadā kyā buum bhī hai jis jagah anqā

'qalaq' is gulshan-e-vīrāñ meñ apnā āshiyāna hai

yagana un ka begana hai begana yagana hai

KHudai se nirala un buton ka karKHana hai

nigah-e-naz se said apna murgh-e-dil nahin hota

kabhi uDta nahin nawak se jo wo ye nishana hai

udhar kaliyan chaTakti hain idhar shor-e-anadil hai

chaman mein kis ki aamad hai ye kaisa shadiyana hai

junun ne ki hai qabr-e-qais ki is tarah aaraish

charagh-e-ghul raushan hain bagula shamiyana hai

hamara haal-e-dil sunne se dil par choT lagti hai

uDa deta hai nind aankhon se jo wo ye fasana hai

phala-phula na kisht-e-dahr mein tuKHm-e-umid-e-dil

nahin aagah jo nashw-o-numa se ye wo dana hai

jahan koshish zara ki naqd-e-mazmun us se hath aaya

zamin-e-sher mein bhi dafn kya koi KHazana hai

bayan karta hai mere wasf aksar apni mahfil mein

ye us ayyar ki mujh se lagawaT ghaebana hai

nawa-sanji se meri bulbulon ke hosh uDte hain

gulon se bhi kahin rangin siwa mera tarana hai

tu mushtaqon se apne chashm-poshi roz karta hai

tere didar ki daulat bhi qarun ka KHazana hai

urus-e-marg se shadi hui hai KHun se lab tar hai

gale mein ye shahid-e-naz ke joDa shahana hai

kal un se puchh lenge karte ho ab bhi dil-azari

jahan tak chahen kar len zulm aaj un ka zamana hai

hamein baKHshe na baKHshe daKHl ya marzi mein malik ki

wagarna us ki rahmat ko to darkar ek bahana hai

jabin-sa rahte hain har-dam malak jinn-o-bashar to kya

dar-e-daulat sara-e-yar ka wo aastana hai

anadil ki sada kya bum bhi hai jis jagah anqa

'qalaq' is gulshan-e-viran mein apna aashiyana hai