yahan bas dekhte hain kaun kitna shor karta hai

yahāñ bas dekhte haiñ kaun kitnā shor kartā hai

sunī jaatī hai us kī jo ziyāda shor kartā hai

mujhe lagtā hai maiñ phir hijr ke sahrā se guzrūñgā

mirī āñkhoñ meñ phir se ek dariyā shor kartā hai

kabhī mujh ko mirī apnī sadā tak bhī nahīñ aatī

kabhī ye dil mire siine meñ itnā shor kartā hai

tumhārī be-lihāzī se yūñhī dil meñ ḳhayāl aaya

agar kaase meñ sikke hoñ to kaasa shor kartā hai

nigalne aate haiñ jo azhdahe dikhte nahīñ ham ko

magar ik shāḳh par baiThā parinda shor kartā hai

churā luuñ ḳhvāb meñ aa.e hue us shaḳhs ko maiñ to

magar mere muqaddar kā sitārā shor kartā hai

unhīñ ke qadmoñ kī aahaT falak se aatī hai sab ko

vo jin ke ḳhuun meñ puḳhta irāda shor kartā hai

rageñ saare badan kī TūTtī mahsūs hotī haiñ

kuchh itne zor se us kā sarāpā shor kartā hai

ajab nisbat kī dekhī haiñ karishma-sāziyāñ 'irfān'

utar kar tan se bhī is kā labāda shor kartā hai

yahan bas dekhte hain kaun kitna shor karta hai

suni jati hai us ki jo ziyaada shor karta hai

mujhe lagta hai main phir hijr ke sahra se guzrunga

meri aankhon mein phir se ek dariya shor karta hai

kabhi mujh ko meri apni sada tak bhi nahin aati

kabhi ye dil mere sine mein itna shor karta hai

tumhaari be-lihazi se yunhi dil mein KHayal aaya

agar kase mein sikke hon to kasa shor karta hai

nigalne aate hain jo azhdahe dikhte nahin hum ko

magar ek shaKH par baiTha parinda shor karta hai

chura lun KHwab mein aae hue us shaKHs ko main to

magar mere muqaddar ka sitara shor karta hai

unhin ke qadmon ki aahaT falak se aati hai sab ko

wo jin ke KHun mein puKHta irada shor karta hai

ragen sare badan ki TuTti mahsus hoti hain

kuchh itne zor se us ka sarapa shor karta hai

ajab nisbat ki dekhi hain karishma-saziyan 'irfan'

utar kar tan se bhi is ka labaada shor karta hai