yahan bhi tu hai wahan bhi tu hai kahan nahin hai kidhar nahin hai

yahāñ bhī tū hai vahāñ bhī tū hai kahāñ nahīñ hai kidhar nahīñ hai

na phir bhī dekhe jo terā jalva vo shaḳhs ahl-e-nazar nahīñ hai

vo qa.ar-e-dariyā ho yā kinārā har ek jā maiñ ne chhān maarā

mizha pe larzāñ sarishk jaisā kahīñ bhī koī guhar nahīñ hai

badan agarche javāñ javāñ hai ragoñ ke andar lahū ravāñ hai

fuzūl sab hai jo bahr-e-dil meñ zuhūr-e-madd-o-jazar nahīñ hai

huzūr chaliye sañbhal sañbhal ke qadam zarā aur halke halke

ḳhayāl rakhiye ye merā dil hai ye aap kī rahguzar nahīñ hai

ga.ī bahāroñ ke raag chheḌo ḳhizāñ rutoñ kī parat udheḌo

tumhārī bazm-e-tarab meñ saaqī abhī mirī chashm-e-tar nahīñ hai

maiñ apnā har kaam apnī had meñ baḌe tayaqqun se kar rahā huuñ

mirī luġhat ke kisī varaq par agar nahīñ hai magar nahīñ

abhī talak us ke rū-e-zebā pe merī nazreñ Tikī huī haiñ

use bhī hai ye gumān-e-ġhālib ki aa.ine ko ḳhabar nahīñ hai

jo bad-chalan thā zamāne bhar kā vahī fazīlat-ma.āb Thahrā

usī ko dastār dī ga.ī hai ki jis ke shāne pe sar nahīñ hai

kabhī jo ghar se safar pe niklo ye baat qirtās-e-dil pe likh lo

ki har sharīk-e-safar hamārā haqīqatan ham-safar nahīñ hai

isī meñ 'aḳhlāq' umr bhar kī masāfatoñ kā hai raaz pinhāñ

ye ek lamha jo vasl kā hai ye sā.at-e-muḳhtasar nahīñ hai

yahan bhi tu hai wahan bhi tu hai kahan nahin hai kidhar nahin hai

na phir bhi dekhe jo tera jalwa wo shaKHs ahl-e-nazar nahin hai

wo qar-e-dariya ho ya kinara har ek ja main ne chhan mara

mizha pe larzan sarishk jaisa kahin bhi koi guhar nahin hai

badan agarche jawan jawan hai ragon ke andar lahu rawan hai

fuzul sab hai jo bahr-e-dil mein zuhur-e-madd-o-jazar nahin hai

huzur chaliye sanbhal sanbhal ke qadam zara aur halke halke

KHayal rakhiye ye mera dil hai ye aap ki rahguzar nahin hai

gai bahaaron ke rag chheDo KHizan ruton ki parat udheDo

tumhaari bazm-e-tarab mein saqi abhi meri chashm-e-tar nahin hai

main apna har kaam apni had mein baDe tayaqqun se kar raha hun

meri lughat ke kisi waraq par agar nahin hai magar nahin

abhi talak us ke ru-e-zeba pe meri nazren Tiki hui hain

use bhi hai ye guman-e-ghaalib ki aaine ko KHabar nahin hai

jo bad-chalan tha zamane bhar ka wahi fazilat-maab Thahra

usi ko dastar di gai hai ki jis ke shane pe sar nahin hai

kabhi jo ghar se safar pe niklo ye baat qirtas-e-dil pe likh lo

ki har sharik-e-safar hamara haqiqatan ham-safar nahin hai

isi mein 'aKHlaq' umr bhar ki masafaton ka hai raaz pinhan

ye ek lamha jo wasl ka hai ye saat-e-muKHtasar nahin hai