yahan har shaKHs apne ghar se kam bahar nikalta hai

yahāñ har shaḳhs apne ghar se kam bāhar nikaltā hai

badan kho baiThne ke Dar se kam bāhar nikaltā hai

koī saudā mire sar meñ samātā hī nahīñ lekin

samā jaa.e to phir vo sar se kam bāhar nikaltā hai

jahāñ sūraj baras meñ ek yā do din chamaktā ho

vahāñ saaya kisī paikar se kam bāhar nikaltā hai

zamīneñ Duub jaanā chāhtī haiñ pyaas aisī hai

magar sailāb hī sāgar se kam bāhar nikaltā hai

vo jis haivān ko patthar ke andar rizq miltā ho

vo patthar kā hai aur patthar se kam bāhar nikaltā hai

na jaane kitnī āvāzeñ bulātī haiñ use lekin

ye sannāTā mire andar se kam bāhar nikaltā hai

abhī ākāsh kā rishta nahīñ TuuTā zamīnoñ se

magar vo abr kī chādar se kam bāhar nikaltā hai

yahan har shaKHs apne ghar se kam bahar nikalta hai

badan kho baiThne ke Dar se kam bahar nikalta hai

koi sauda mere sar mein samata hi nahin lekin

sama jae to phir wo sar se kam bahar nikalta hai

jahan suraj baras mein ek ya do din chamakta ho

wahan saya kisi paikar se kam bahar nikalta hai

zaminen Dub jaana chahti hain pyas aisi hai

magar sailab hi sagar se kam bahar nikalta hai

wo jis haiwan ko patthar ke andar rizq milta ho

wo patthar ka hai aur patthar se kam bahar nikalta hai

na jaane kitni aawazen bulati hain use lekin

ye sannaTa mere andar se kam bahar nikalta hai

abhi aakash ka rishta nahin TuTa zaminon se

magar wo abr ki chadar se kam bahar nikalta hai