yahan janazon mein qatil sharik hote hain

yahāñ janāzoñ meñ qātil sharīk hote haiñ

so dīn-o-duniyā alag kar ke log rote haiñ

tavīl bujhte charāġhoñ kā silsila hai jise

ham apne zabt kī dīvār meñ pirote haiñ

khurach rahe haiñ vo kapḌoñ se ḳhuun ke chhīñTe

agarche daaġh to ā.īne par bhī hote haiñ

junūñ kamāyā hai is maslahat kī duniyā meñ

aur apnī nasl kī gaaḌī meñ ḳhvāb jote haiñ

bayāniya to samundar bhī ye banātā hai

savār hote haiñ jo kashtiyāñ Dubote haiñ

isī tarah se panapte haiñ ahl-e-haq 'hāris'

ham apne ḳhuun ke qatre zamīñ meñ bote haiñ

yahan janazon mein qatil sharik hote hain

so din-o-duniya alag kar ke log rote hain

tawil bujhte charaghon ka silsila hai jise

hum apne zabt ki diwar mein pirote hain

khurach rahe hain wo kapDon se KHun ke chhinTe

agarche dagh to aaine par bhi hote hain

junun kamaya hai is maslahat ki duniya mein

aur apni nasl ki gaDi mein KHwab jote hain

bayaniya to samundar bhi ye banata hai

sawar hote hain jo kashtiyan Dubote hain

isi tarah se panapte hain ahl-e-haq 'haaris'

hum apne KHun ke qatre zamin mein bote hain