yahan jo bhi tha tanha tha yahan jo bhi hai tanha hai

yahāñ jo bhī thā tanhā thā yahāñ jo bhī hai tanhā hai

ye duniyā hai ye duniyā hai isī kā naam duniyā hai

na bolā un se jaatā hai na dekhā un se jaatā hai

yahāñ gūñgoñ kī bastī hai yahāñ andhoñ kā pahrā hai

vo manzil thī tahayyur kī ye manzil hai tafakkur kī

vahāñ parda bhī jalva thā yahāñ jalva bhī pardā hai

vo aalam thā ta.ayyun kā vahāñ parda hī parda thā

ye aalam hai tayaqqun kā yahāñ jalva hī jalva hai

sabhī majrūh haiñ is said-gāh-e-aish-o-hirmāñ meñ

kisī kā zaḳhm ochhā hai kisī kā zaḳhm gahrā hai

jo vo ik ḳhush-ḳhayālī thī to ye ik kam-nigāhī hai

na vo phūloñ kā gulshan thā na ye kāñToñ kā sahrā hai

vo ahl-e-qāl kī majlis ye ahl-e-hāl kī majlis

vahāñ jo kuchh thā maazī thā yahāñ jo kuchh hai fardā hai

ye naddī to nahīñ jo āb-e-shīrīñ de sake tum ko

hai paanī utnā hī namkīñ samundar jitnā gahrā hai

yahāñ tarshe hue lafzoñ kā sikka chal nahīñ saktā

ye bāzār-e-ma.ānī hai yahāñ motī bhī qatra hai

'jamīl' āñkhoñ ke paT kholo ise bhī ik nazar tolo

vo nairañg-e-tasavvur thā ye nairañg-e-tamāshā hai

yahan jo bhi tha tanha tha yahan jo bhi hai tanha hai

ye duniya hai ye duniya hai isi ka nam duniya hai

na bola un se jata hai na dekha un se jata hai

yahan gungon ki basti hai yahan andhon ka pahra hai

wo manzil thi tahayyur ki ye manzil hai tafakkur ki

wahan parda bhi jalwa tha yahan jalwa bhi parda hai

wo aalam tha tayyun ka wahan parda hi parda tha

ye aalam hai tayaqqun ka yahan jalwa hi jalwa hai

sabhi majruh hain is said-gah-e-aish-o-hirman mein

kisi ka zaKHm ochha hai kisi ka zaKHm gahra hai

jo wo ek KHush-KHayali thi to ye ek kam-nigahi hai

na wo phulon ka gulshan tha na ye kanTon ka sahra hai

wo ahl-e-qal ki majlis ye ahl-e-haal ki majlis

wahan jo kuchh tha mazi tha yahan jo kuchh hai farda hai

ye naddi to nahin jo aab-e-shirin de sake tum ko

hai pani utna hi namkin samundar jitna gahra hai

yahan tarshe hue lafzon ka sikka chal nahin sakta

ye bazar-e-maani hai yahan moti bhi qatra hai

'jamil' aankhon ke paT kholo ise bhi ek nazar tolo

wo nairang-e-tasawwur tha ye nairang-e-tamasha hai