yahan ki fikr wahan ka KHayal rakkha hai

yahāñ kī fikr vahāñ kā ḳhayāl rakkhā hai

akele donoñ jahāñ ko sambhāl rakkhā hai

siyāh gesū ko shānoñ pe Daal rakkhā hai

balā kā saañp sapere ne paal rakkhā hai

mujhe to hashr ke va.ade pe Taal rakkhā hai

ajal kā naam badal kar visāl rakkhā hai

ye din ke dosh pe bikhrī haiñ shaam kī zulfeñ

ki ik machhere ke kāñdhe pe jaal rakkhā hai

jis āftāb ko samjhe the sab ki Duub gayā

use gilass meñ rindoñ ne Dhaal rakkhā hai

ye kaun aisī parī hai ki jis ko rindoñ ne

zamīñ se tā-ba-surayyā uchhāl rakkhā hai

hamārī tauba kā ḳhuuñ hai ki bāda-e-rañgīñ

ye jaam jaam meñ kyā laal laal rakkhā hai

zamāna detā hai mujh ko zavāl kī dhamkī

na jaane kaun sā mujh meñ kamāl rakkhā hai

'nazīr' mar ke chukānā paḌegā qarz-e-hayāt

nahīñ gar aaj to kal intiqāl rakkhā hai

yahan ki fikr wahan ka KHayal rakkha hai

akele donon jahan ko sambhaal rakkha hai

siyah gesu ko shanon pe Dal rakkha hai

bala ka sanp sapere ne pal rakkha hai

mujhe to hashr ke wade pe Tal rakkha hai

ajal ka nam badal kar visal rakkha hai

ye din ke dosh pe bikhri hain sham ki zulfen

ki ek machhere ke kandhe pe jal rakkha hai

jis aaftab ko samjhe the sab ki Dub gaya

use gilass mein rindon ne Dhaal rakkha hai

ye kaun aisi pari hai ki jis ko rindon ne

zamin se ta-ba-surayya uchhaal rakkha hai

hamari tauba ka KHun hai ki baada-e-rangin

ye jam jam mein kya lal lal rakkha hai

zamana deta hai mujh ko zawal ki dhamki

na jaane kaun sa mujh mein kamal rakkha hai

'nazir' mar ke chukana paDega qarz-e-hayat

nahin gar aaj to kal intiqal rakkha hai