yahan masruf ho kar bhi raha be-kar itna hi

yahāñ masrūf ho kar bhī rahā be-kār itnā hī

na koī ishq thā aisā magar maiñ ḳhaar itnā hī

bichhaḌne par tulā jab vo sunī koī nahīñ us ne

ki āḳhir saare meñ thā maiñ bhī hisse-dār itnā hī

ba-zāhir to yahī lagtā hai sab āsān hī hogā

haqīqat meñ magar ye kaam hai dushvār itnā hī

ab us ne koī likh kar to nahīñ denī hameñ ye baat

ki sab ke sāmne ho saktā hai iqrār itnā hī

bahut vāzeh batā dene se bantī hī nahīñ vo baat

zarūrī hai kisī bhī sher meñ iz.hār itnā hī

koī palḌā to bhārī honā hai āḳhir tarāzū kā

abhī iqrār hai us kā yahāñ inkār itnā hī

zarūrat se ziyāda to maiñ rakhtā hī nahīñ hargiz

mirā hissa hai puurā aur mujhe darkār itnā hī

izāfa karnā hai miqdār meñ āhista āhista

ki aisā kaam ho saktā hai pahlī baar itnā hī

yahan masruf ho kar bhi raha be-kar itna hi

na koi ishq tha aisa magar main KHar itna hi

bichhaDne par tula jab wo suni koi nahin us ne

ki aaKHir sare mein tha main bhi hisse-dar itna hi

ba-zahir to yahi lagta hai sab aasan hi hoga

haqiqat mein magar ye kaam hai dushwar itna hi

ab us ne koi likh kar to nahin deni hamein ye baat

ki sab ke samne ho sakta hai iqrar itna hi

bahut wazeh bata dene se banti hi nahin wo baat

zaruri hai kisi bhi sher mein izhaar itna hi

koi palDa to bhaari hona hai aaKHir taraazu ka

abhi iqrar hai us ka yahan inkar itna hi

zarurat se ziyaada to main rakhta hi nahin hargiz

mera hissa hai pura aur mujhe darkar itna hi

izafa karna hai miqdar mein aahista aahista

ki aisa kaam ho sakta hai pahli bar itna hi