yahan to paun sadi se yahi kahani hai

yahāñ to paun sadī se yahī kahānī hai

usuul mar ga.e tāqat kī hukmrānī hai

jo un kī baat na maane miTā diyā jaa.e

hukūmatoñ kī ye 'ādat bahut purānī hai

kisī yazīd kī bai'at jo maiñ nahīñ kartā

mirī anā mire ajdād kī nishānī hai

bhare hue haiñ hamāre badan baġhāvat se

ragoñ meñ apne miyāñ ḳhuun hai na paanī hai

hai mo'jiza ki luTere haiñ chār-sū phir bhī

hamārā shahr mohabbat kī rājdhānī hai

nahīñ hai 'aql se apnī muḳhālifat lekin

'umair' ham ne hamesha se dil kī maanī hai

yahan to paun sadi se yahi kahani hai

usul mar gae taqat ki hukmrani hai

jo un ki baat na mane miTa diya jae

hukumaton ki ye 'adat bahut purani hai

kisi yazid ki bai'at jo main nahin karta

meri ana mere ajdad ki nishani hai

bhare hue hain hamare badan baghawat se

ragon mein apne miyan KHun hai na pani hai

hai mo'jiza ki luTere hain chaar-su phir bhi

hamara shahr mohabbat ki rajdhani hai

nahin hai 'aql se apni muKHalifat lekin

'umair' hum ne hamesha se dil ki mani hai