yahan to shahr se diwar-o-dar hi ghaeb hain

yahāñ to shahr se dīvār-o-dar hī ġhā.eb haiñ

chhatoñ ke ba.ad makānoñ ko le uḌī hai havā

tamām shahr thā saḌkoñ pe aaj raat ga.e

sunā hai phir se javānoñ ko le uḌī hai havā

safar hai raat kā sahrā se vāpsī kaisī

tumhāre saare nishānoñ ko le uḌī hai havā

chalegī vaqt kī āñdhī to kis ko baḳhshegī

na jaane kitne zamānoñ ko le uḌī hai havā

rahā na ab vo lab-e-jū rahā na mai-ḳhāna

hamāre saare Thikānoñ ko le uḌī hai havā

chalo vo vasl kā va.ada bhī kal-adam Thahrā

tumhāre saare bahānoñ ko le uḌī hai havā

havā ke dosh pe uḌte to haiñ parinde par

nazar ke sāmne dānoñ ko le uḌī hai havā

paḌe haiñ tiir yahāñ ġhāziyoñ ke tarkash meñ

añdherī shab meñ kamānoñ ko le uḌī hai havā

ġhalat the saare vo mīzāñ fareb taḳhmīne

hamāre saare gumānoñ ko le uḌī hai havā

rakhe the kis ne vo aurāq tāqche pe 'ayāz'

vo chāhatoñ ke fasānoñ ko le uḌī hai havā

yahan to shahr se diwar-o-dar hi ghaeb hain

chhaton ke baad makanon ko le uDi hai hawa

tamam shahr tha saDkon pe aaj raat gae

suna hai phir se jawanon ko le uDi hai hawa

safar hai raat ka sahra se wapsi kaisi

tumhaare sare nishanon ko le uDi hai hawa

chalegi waqt ki aandhi to kis ko baKHshegi

na jaane kitne zamanon ko le uDi hai hawa

raha na ab wo lab-e-ju raha na mai-KHana

hamare sare Thikanon ko le uDi hai hawa

chalo wo wasl ka wada bhi kal-adam Thahra

tumhaare sare bahanon ko le uDi hai hawa

hawa ke dosh pe uDte to hain parinde par

nazar ke samne danon ko le uDi hai hawa

paDe hain tir yahan ghaziyon ke tarkash mein

andheri shab mein kamanon ko le uDi hai hawa

ghalat the sare wo mizan fareb taKHmine

hamare sare gumanon ko le uDi hai hawa

rakhe the kis ne wo auraq taqche pe 'ayaz'

wo chahaton ke fasanon ko le uDi hai hawa