yahan yun hi nahin pohncha hun main

yahāñ yuuñ hī nahīñ pohñchā huuñ maiñ

musalsal raat din dauḌā huuñ maiñ

tirī zanjīr kā hissa huuñ maiñ

rihā ho bhī nahīñ saktā huuñ maiñ

tumhārī oT meñ jitnā huuñ maiñ

bas utnā hī nazar aatā huuñ maiñ

tumhāre sāmne baiThā huuñ maiñ

yahī to soch kar zinda huuñ maiñ

Darātā hai ḳhudā se jab koī

ḳhudā ke pīchhe chhup jaatā huuñ maiñ

pareshāñ dhuup kartī hai mujhe

shikāyat chāñd se kartā huuñ maiñ

bahut kuchh kahnā paḌtā ho jahāñ

vahāñ par kuchh nahīñ kahtā huuñ maiñ

manā legī use mā'lūm hai

abhī sach-much nahīñ rūThā huuñ maiñ

yahan yun hi nahin pohncha hun main

musalsal raat din dauDa hun main

teri zanjir ka hissa hun main

riha ho bhi nahin sakta hun main

tumhaari oT mein jitna hun main

bas utna hi nazar aata hun main

tumhaare samne baiTha hun main

yahi to soch kar zinda hun main

Daraata hai KHuda se jab koi

KHuda ke pichhe chhup jata hun main

pareshan dhup karti hai mujhe

shikayat chand se karta hun main

bahut kuchh kahna paDta ho jahan

wahan par kuchh nahin kahta hun main

mana legi use ma'lum hai

abhi sach-much nahin ruTha hun main